الخميس، ١٣ ديسمبر ٢٠٠٧

يوم الامتحان...يظهر البرشام..ويبان...


روحت مشوار...فالراجل قال لي عدي بعد ساعة...قلت يا واد يا خالد روح لك ساعة عند الاستاذ محمود بتاع النت....
جيت ألقي عليكم أسألة امتحان...
ممنوع الغــش...ممنوع حد يبص للي جمبه


امتحان...من خلال قراءتك للواقع وللكتب...وليس من خلال أفكار الآخرين....

أسألة الاختيار من متعدد:

بتاكل كم رغيف في اليوم
(خمسة-عشرة-عشرين- عامل ريجيم- أنا واخد أوضة في الفرن بتاع العيش)


كيف تنظر للعلماني؟

(شخص متحضر- شخص عميل- شخص كافر)

كيف تنظر للوهابي(السلفي ) يعني

(متشدد- مبتدع- على السنة)

كيف تنظر للدين
(وسيلة للعيش-هدف سامي-شئ غير ضروري-فكرة مبالغ فيها)

كيف تفكر في أوقاتك فراغك
(في ذنوبك- في معصية تريد أن تفعلها- في خلق الله وعظمته)

كم مرة تأكل في اليوم؟
(مرة -اتنين- تلاتة- صفــر)

هل تفضل
(الشاي مع الجبن- الشاي لوحده- لا أحب الشاي)

ماذا تفعل إذا رأيت متبرجة
(تدعو عليها وتسبها- تغض بصرك وتدعو لها بالهداية- تتمنى لها الموت)

ماذا تفعل عند استيقاظك من النوم
(تقتح عينيك-تتوضأ وتصلي- تتاوب وتنام تاني)

كم مرة تصلي على النبي -ص- في اليوم
(مرة-عشرة-كثيراً- بصراحة بانسى)

لماذا تحب والديك
(عشان بيأكلوني وبيشربوني-لأن الله أمرني ببرهما- أنا باسب لهم)

الصلوات المفروضة

(أصليها في المسجد كلها- يعني شوية وشوية- أنا مش باصلي خالص)

لو شفت كلب في الشارع

(تجري- تمشي بشويش- توطي تجيب طوبة وتلقه)

رأيك في صاحب المدونة(سيسألك الله عن إجابتك)

(متشدد- يحاول إنقاذ ما يمكن إنقاذه- يفسد أكثر مما يصلح)


ناوي تتوب؟
(أكيد طبعاً - وأتوب ليه؟ - سيبني أفكــر)

عندك ايميل
(هوتميل- ماسنجر- اول-اي سي كيو- ولا واحد- مليكش دعوة)

بقالك على النت من امته؟
(شنة-اتنين-خمسة-انا من المؤسسين ليه- أنا بابصم)

بتحب تصيف في
(شاطئ مختلط- شاليه لوحدي أنا والعائلة- مش باروح مصايف-ياعم بص لأحوال المسلمين مصيف إيه)

أنت
(مسلم- نصراني- ملحد)

أنت
(مسلم-مؤمن-محســن)

متى كانت آخر مرة ركبت فيها أتوبيس

(من سنة- من شهر -امبارح- أنا باشتغل تباع)

معدل استهلاكك للميه
(شوية صغيرين- شوية قليلين- خزان يومياً- كتير أوي)

بتاكل كم وجبة في اليوم
(1 -2-3- أقولك ومتزعلش- أنا ساكن في المطبخ)

هل تفضل الزواج من
(علمانية- ليبرالية- نصرانية محصنة)

لو شفت راجل بيرقص في فرح

(تنظر إليه نظرة ريب- تقول واأسفا على الرجولة- تتحزم وترقص معاه)

أي هذه المدونات تأخذك إلى عالم الجاهلية...والعصور الوسطى...

(عصفور المدينة-المهاجر إلى الله- ضاكتور خالد-كلهم- لاشئ)

هتعمل إيه في العيد
(هاشتري خروف-هاشتري جدي-هالبس جلبية قديمة وأروح ألم الأضاحي- هاتمرجح)

أي هؤلاء المشايخ تحب أن تستمع له (ليست مفاضلة بينهم)

(محمد حسان-وجدي غنيم- محمد حسين يعقوب- شيخ البلد..بتاع الكشري اللي في عباس العقاد)

تتوقع كم بلغت ذنوبك منذ التكليف
(مليون- مليار-متعدش ورايا- أنا نضيف يا عمنا)

أيهم تحب

(بيض مسلوق-بيض مقلي- بيض بالبسطرمة- باكرهك انت والبيض)

نسألكم الدعـــاء...
(حاضر هادعيلك-هادعي عليك- تدفع كام وأنا أدعيلك)
--------------------------------
والله الموفق.....











هناك ١٧ تعليقًا:

عصفور المدينة يقول...

بتاكل كم رغيف في اليوم
عامل ريجيم
كيف تنظر للعلماني؟

شخص مخدوع

كيف تنظر للوهابي(السلفي ) يعني

في المرآة

كيف تنظر للدين

الحياة

كيف تفكر في أوقاتك فراغك
في ذنوبي - في خلق الله وعظمته)

كم مرة تأكل في اليوم؟
اتنين

هل تفضل
الشاي لوحده

ماذا تفعل إذا رأيت متبرجة

أغض بصري بعفوية يعين ما اشغلش نفسي بيها كثير

ماذا تفعل عند استيقاظك من النوم
تقتح عينيك

كم مرة تصلي على النبي -ص- في اليوم
كثيراً

لماذا تحب والديك
لأن الله أمرني ببرهما

الصلوات المفروضة

أصليها في المسجد كلها(إلا بعذر)

لو شفت كلب في الشارع

بيجري مني

رأيك في صاحب المدونة(سيسألك الله عن إجابتك)

يحاول إنقاذ ما يمكن إنقاذه
بس ساعات بيخبط من السرعة يعني

ناوي تتوب؟
مشكلة كل شوية أتوب وأذنب
عندك ايميل
كل كله
بقالك على النت من امته؟عشر سنوات

بتحب تصيف في
بظروفها
أنت
مسلم

أنت
مؤمن

متى كانت آخر مرة ركبت فيها أتوبيس
من شهر
معدل استهلاكك للميه
متوسط

بتاكل كم وجبة في اليوم
السؤال مكرر
هل تفضل الزواج من
متزوج

لو شفت راجل بيرقص في فرح
اغض بصري
أي هذه المدونات تأخذك إلى عالم الجاهلية...والعصور الوسطى...
هههههههه ش ش
هتعمل إيه في العيد
لسة بادور
أي هؤلاء المشايخ تحب أن تستمع له (ليست مفاضلة بينهم)

(محمد حسان-وجدي غنيم- محمد حسين يعقوب-

تتوقع كم بلغت ذنوبك منذ التكليف
اللي تبت منهم ولا اللي لسة؟
أيهم تحب

(بيض مسلوق-بيض مقلي- بيض بالبسطرمة- باكرهك انت والبيض)
بيض مسلوق - بيض مقلي بيض بسميط
نسألكم الدعـــاء...
(حاضر هادعيلك-هادعي عليك- تدفع كام وأنا أدعيلك)
حاضر حادعيلك

دعوة الفردوس يقول...

بتاكل كم رغيف في اليوم

ابقى جدعه اوي لو وصلوا اربعه ولاتلاته على مدار اليوم كله


كيف تنظر للعلماني؟
شخص مش فاهم دينه وبيتفزلك


كيف تنظر للوهابي(السلفي ) يعني
ناس محترمه وبتسعى لرضا الله بس لو يعي قضية الشموليه


كيف تنظر للدين
منهج حياه


كيف تفكر في أوقاتك فراغك
في حاجات كتير يمكن كل اللي انت قلته وبفكر في اللي نفسي احققه وكم مره اتوب وارجع وعايزه ازود ايه في الطاعات قريب وفي صحباتي وكل حاجه
انا دماغي مش بتبطل زن على فكره


كم مرة تأكل في اليوم؟
اتنين احيانا مره احيانا بنسى اكل



هل تفضل
الشاي لوحده


ماذا تفعل إذا رأيت متبرجة
تغض بصرك وتدعو لها بالهداية بس احيانا بيكون المنظر فوق المستفز اتنرفز واجي قايله يخرب بيت الكفره او ادعي على شارون وبعدها اقول ربنا يهدي وبس


ماذا تفعل عند استيقاظك من النوم
تتاوب وتنام تاني



كم مرة تصلي على النبي -ص- في اليوم
كثيرا ولكن احيانا يغلب الاستغفار


لماذا تحب والديك
فطرت على حبهما وكل حاجه بيعملوها علشاني تخليني مش بس احبهم متخيلش حياتي من غيرهم


الصلوات المفروضة
يعني شوية وشوية واحيانا مش كل يوم بدخل المسجد


لو شفت كلب في الشارع
بعض على لساني واقفل بقي وامشي ادعي في سري واتقي شره خالص ولو في طريق تاني يبقى افضل
ولو قطه طبيعي جدا اسيبلها الشارع لو ضيق او امشي ابعد مايكون عنها




رأيك في صاحب المدونة(سيسألك الله عن إجابتك
انا مدخلتش عنده كتير بس من الكام مره دول اقدر اقول يحاول إنقاذ ما يمكن إنقاذه والاجمل انه يبدا بنفسه



ناوي تتوب؟
اكييييييد وكل شويه اتوب وارجع اذنب واستعين بركعتين توبة
ربنا يتوب علينا وعليكوا

عندك ايميل
هوتميل وماسنجر من الاختيارات دي


بقالك على النت من امته؟
بتاع اربع سنين يمكن اكتر



بتحب تصيف في
مع بابا وماما واخواتي في شقه وفي اليكس تحديدا


انت
مسلم


انت
مؤمن




متى كانت آخر مرة ركبت فيها أتوبيس
مش بركب باصات الا في الرحلات ومطلعتش رحلات من زمان



معدل استهلاكك للميه
مش كتير اوي بس بصراحه ممكن اوفر اكتر جزاكم الله خيرا على التذكير


بتاكل كم وجبة في اليوم
هي سيره ماقلنا من شويه


هل تفضل الزواج من
مسلم ملتزم وياحبذا لو حافظ للقران او على الاقل بيجتهد في حفظه اخوان او موافق على شغلي معاهم تكون دماغه نضيفه ومتسع المدارك


لو شفت راجل بيرقص في فرح
نفسي بتموع وبقول صوتي ياانشراح زمن الرجوله راح


أي هذه المدونات تأخذك إلى عالم الجاهلية...والعصور الوسطى
ولا واحده


هتعمل إيه في العيد
هروح البلد اعيد هناك وهقضيه مذاكره لان امتحاني بعد العيد علطول


أي هؤلاء المشايخ تحب أن تستمع له (ليست مفاضلة بينهم
وجدي غنيم
محمد حسان



تتوقع كم بلغت ذنوبك منذ التكليف
اسال الله العافيه لو كنت بطلت اذنب كنت عديت اللي قبل كده بس بدل مااشغل بالي بالعد احاول اتوب عن اللي بذنب فيه دلوقت


أيهم تحب
بص يااخي انا مليش في البيض بس مش هقول بكرهك بس لو هاكل بيض يااما مقلي يااما مسلوق من غير حاجه معاه وميبقاش كتير

نسألكم الدعـــاء...
اول ماقريت السؤال دعيتلك وحاااااااااضر هدعيلك

ابن حـجـر الـعـسـقـلانـى يقول...

بصراحة من أكتر الأسئلة اللى هزتنى .. هذا السؤال

تتوقع كم بلغت ذنوبك منذ التكليف ؟؟

الطائر الحزين يقول...

بتاكل كم رغيف في اليوم
3.5

كيف تنظر للعلماني؟
بيستعبط


كيف تنظر للوهابي(السلفي ) يعني
على سنه


كيف تنظر للدين
الحياه

كيف تفكر في أوقاتك فراغك
ذنوبى

كم مرة تأكل في اليوم؟
اثنين او ثلاثة
امبارح كلت مرة ونصف

هل تفضل
الشاي مع الجبن لم اكون عاوز اكل
والشاى بس لما اكون مش عاوز اكل
ومش عاوز شاى لما اكون مش عاوز اكل ومش عاوز اشرب شاى

ماذا تفعل إذا رأيت متبرجة
اللهم ارحمنا واسترنا

ماذا تفعل عند استيقاظك من النوم
تتوضأ وتصلى

كم مرة تصلي على النبي -ص- في اليوم
مش عارف

لماذا تحب والديك
لأن الله أمرني ببرهما
وهذه غريزة

الصلوات المفروضة

أصليها في المسجد كلها

لو شفت كلب في الشارع
انت تقصد كلب اللى مثل الاسد
تمشي بشويش

رأيك في صاحب المدونة

بحبة فاكر لما قلت لى حبيبى الطائر الحزين
قلت ياه هل انا مقرب له لهذه الدرجة يارب اكون استحقها


ناوي تتوب؟
يارب

عندك ايميل
مليكش دعوة

بقالك على النت من امته؟
مش عارف بس يمكن من 5


بتحب تصيف في
مش فاكر اخر مرة ضيفت فيها كان امتى؟

أنت
مسلم ان شاء الله

أنت
مسلم ان شاء الله

متى كانت آخر مرة ركبت فيها أتوبيس
الساعه 10 بالليل امس


معدل استهلاكك للميه
شوية قليلين


بتاكل كم وجبة في اليوم
2 غالبا

هل تفضل الزواج من
تقصد اتزوج تانى

لو شفت راجل بيرقص في فرح

ما هو بقى فيه مسابقة للرجالة كمان

أي هذه المدونات تأخذك إلى عالم الجاهلية...والعصور الوسطى...

----------------
هتعمل إيه في العيد
الله المستعان

أي هؤلاء المشايخ تحب أن تستمع له (ليست مفاضلة بينهم)

محمد حسان-وجدي غنيم- محمد حسين يعقوب

تتوقع كم بلغت ذنوبك منذ التكليف
متعدش ورايا
عارف جه فى دماغى اعمل حملة ونقول فيها لا تفوت يوم بدون ما تعمل حسنة

أيهم تحب

بيض مسلوق - بس باكل المقلى

نسألكم الدعـــاء...
حاضر وفى الجمعة ان شاء الله

الطائر الحزين يقول...

مؤمن ان شاء الله

أمــانــى يقول...

ممكن اجاوب
بتاكل كم رغيف في اليوم؟
2او 3 او بسكويت على حساب اليوم
كيف تنظر للعلماني؟
شخص عادى ربنا يهديه
كيف تنظر للوهابي(السلفي ) يعني
على السنة بس المبتسم ام بقى المكشر ربنا يهديه برضو
كيف تنظر للدين؟
نعمةربنا اعطاها لنا
كيف تفكر في أوقاتك فراغك؟
حكاوى ونت وخروجة وقراية اللى عفى عليه الزمن
كم مرة تأكل في اليوم؟
مرة ولو ربنا كرمنى يبقى اثنين
هل تفضل الشاى ؟
ماليش فى الشاى بأشربه غلاسة
ماذا تفعل إذا رأيت متبرجة؟
عادى بأدعى ربنا يهديها
ماذا تفعل عند استيقاظك من النوم؟
على حساب نوع الاستيقاظ
كم مرة تصلي على النبي -ص- في اليوم؟
مش بأعد وكل ما افتكر اصلى اكتر
لماذا تحب والديك؟
بأحمد ربنا عليهم كفاية مستحملينى
الصلوات المفروضة؟
الحمدلله فى البيت
لو شفت كلب في الشارع؟
ياخراشى بأقف فى مكانى اعيط عندى فوبيا من الكلاب
رأيك في صاحب المدونة(سيسألك الله عن إجابتك)؟
بيحاول ينقذ بس ساعات بيكون ردوده شديده وعلى فكرة بأكون حريصة اووى فى التعليق وبأعمل حساب الكلمة معرفش ليه لانه يمتلك الهيبة والموضوعات الفكاهية بأموت من الضحك اوعى حضرتك تزعل حضرتك اللى قولت هنتسأل عليه
ناوي تتوب؟
من ايه امممممم
عندك ايميل؟
هوتميل وياهو جيمل وفيس بوك
بقالك على النت من امته؟
حديثة فى التكنولوبيا يعنى من 2003 بس
بتحب تصيف ؟
والله نفسى بس الظروف دايما بتكون ضدى سبحان الله
أنت؟
مسلمة الحمدلله
أنت ؟
مومنة
متى كانت آخر مرة ركبت فيها أتوبيس؟
من سنة لما كنت فى القاهرة والبنات عملوا انهم عارفين البلد ركبونى اتوبيس
معدل استهلاكك للميه؟
مش كتير لما افتكر اشرب
بتاكل كم وجبة في اليوم؟
واحدة ولو ربنا كرمنى يبقى اتنين
هل تفضل الزواج من ؟

لو شفت راجل بيرقص في فرح؟
باتفرج بس بأكون متغاظة منه
أي هذه المدونات تأخذك إلى عالم الجاهلية...والعصور الوسطى...؟
ليه بس كده ربنا يكرمهم جميعآ ويجعل كتاباتهم فى ميزان حسناتهم
هتعمل إيه في العيد؟
هأنااااااام ثم هأنااااااااام
أي هؤلاء المشايخ تحب أن تستمع له (ليست مفاضلة بينهم)؟
محمد حســان ووجدى غنيم وعمر عبد الكافى
تتوقع كم بلغت ذنوبك منذ التكليف؟
ربنا يرحمنى والله مش عارفه
أيهم تحب؟
المسلوق والمقلى بس بصراحة مش الملقى المحروق بمعنى اصح
نسألكم الدعـــاء؟
حـاضر ويبقى كمان حضرتك تدعيلنا

belal يقول...

الإختيارات مش عارف أختار
العلماني مثلا مش متحضر ويمكن مش عميل
ومش كافر..العلماني أنا شايفه راجل متخلف
..
والسلفيين مش مجموعة محددة عشان نختار
والاختيارات حتى لو حضرتك محددهم
ما ينفعش يكون فيها متشدد
..

mohand يقول...

السلام عليكم

الاسئلة اجباري؟

محمد عبد الغفار يقول...

بتاكل كم رغيف في اليوم
مش عامل رجيم ولكن قد تمر ايام طويله لا اكل فيها عيش من اساسه انما لو حسبنا متوسط على شهر مثلاً فنقدر نقول 3/4 رغيف فى اليوم

كيف تنظر للعلماني؟
مضحوك عليه


كيف تنظر للوهابي(السلفي ) يعني
كلمة وهابى لا احبها ولا تعنى عندى السلفى انما السلفى ان كان متفتح من عينه عصفور مثلاُ فأحبه واشيله فى عنيه واتمى ابقى زيه

كيف تنظر للدين
منهج حياه

كيف تفكر في أوقاتك فراغك
فى تدابير الله فى عيشتى

كم مرة تأكل في اليوم؟
فى الأغلب مره وساعات مرتين

هل تفضل
الشاي مع عيش وجبنه بس لا افعل ذلك حيث اشرب الشاى مره واحده فقط فى يومياً فى اوقات العمل

ماذا تفعل إذا رأيت متبرجة
استعيذ بالله

ماذا تفعل عند استيقاظك من النوم
بخش الحمام

كم مرة تصلي على النبي -ص- في اليوم
معدتش الحقيقه

لماذا تحب والديك
(أخيراً اجابه من الأختيارات - لأن الله أمرني ببرهما

الصلوات المفروضة
فى جماعه داخل العمل شتاء اما فى الصيف فالوقت متاح لصلاه المغرب والعشاء والفجر فى الجامع

لو شفت كلب في الشارع
لا اهتم

رأيك في صاحب المدونة(سيسألك الله عن إجابتك)

يحاول إنقاذ ما يمكن إنقاذه

ناوي تتوب؟
أكيد طبعاً

عندك ايميل
هوتميل- ماسنجر--اي سي كيو

بقالك على النت من امته؟
سبع سنوات

بتحب تصيف في
شاليه لوحدي أنا والعائلة ده اذا صيفت يعنى

أنت
مسلم

أنت
مسلم

متى كانت آخر مرة ركبت فيها أتوبيس
من شهر

معدل استهلاكك للميه
18 م شهرياً انا واسرتى

بتاكل كم وجبة في اليوم
تانى!!

هل تفضل الزواج من
اتجوزت من مسلمة تصدق

لو شفت راجل بيرقص في فرح
حسب نوع الرقص وسن الرجل

أي هذه المدونات تأخذك إلى عالم الجاهلية...والعصور الوسطى...

لاشئ

هتعمل إيه في العيد
هلبس اشيك حاجه انا ومراتى وابنى واخت مراتى كمان ونروح نصلى العيد كلنا فى ساحه مسجد الحصرى ولن اضحى هذا العام لظروفى الماديه

أي هؤلاء المشايخ تحب أن تستمع له (ليست مفاضلة بينهم)
محمد حسان

تتوقع كم بلغت ذنوبك منذ التكليف
اتوقع ن الله غفور

أيهم تحب
بحب الثلاثه انما لو الثلاثه متاحين وهختار مبينهم يبقى بيض بالبسطرمة

نسألكم الدعـــاء...
دعتلك فعلاً

منى يقول...

السلام عليكم
كام رغيف دى حسب الحاله بس مش كتير
العلمانى
معظمهم مغرور بعقله
الدين
منهج للحياه
بفكر حسب الظروف وقتها
باكل مره او اتنين او تلانه حسب جدول العمل واحيانا انسى
مبشربش شاىالاللضروره
لو شفت متبرجه بقول الحمد لله وربنا يهديها
طبعا اول ما اصحى بفتح عينيه
مقدرش احدد بصلى على الحبيب المصطفى قد ايه؟مش كل يوم زى التانى
بحب والدى لان ربنا فطرنى على حبهم
بصلى فى البيت فى المسجد نادرا
طبعا اتمنى اصيف فى شاليه خاص بس هو فين
عموما بطلنا نصيف
لو شفت كلب امشى ابعد ما استطيع وافضل ادعى واقول ايه الكرسى لحد ما ابعد
اكيد بتمنى التوبه من اللى اعرفه واللى مااعرفوش
بقالى على النت 8 شهور
انا مسلمه ولله الحمد
بصراحه معرفش كويس غير مدونه عصفور المدينه وسعيده جدا بها
لو شفت رجل بيرقص بدير وشى واقول واحسرتاه على الرجوله
ربنا اعلم باذنوب وبادعى يغفرلى
بفضل البيض المسلوق
طبعا هدعيلك

لاحظ ان ملخبطه تقريبا وجايز اكون نسيت حاجه
بس بصراحه عنيه وجعتنى

تحياتى

ma 3lina يقول...

بتاكل كم رغيف في اليوم
والله يا خويا اقل من خمسة .. مجبر أخاك لا بطل

كيف تنظر للعلماني؟
شخص عبيط

كيف تنظر للوهابي(السلفي ) يعني
على السنة

كيف تنظر للدين
كاتلوج البشرية

كيف تفكر في أوقاتك فراغك
مش عارف

كم مرة تأكل في اليوم؟
مرة .. برضه مجبر أخاك .. عااااااااا

هل تفضل
لا أحب الشاي

ماذا تفعل إذا رأيت متبرجة
اتمنى لها أن تفهم

ماذا تفعل عند استيقاظك من النوم
بفتح عيني

كم مرة تصلي على النبي -ص- في اليوم
إحم إحم .. أيوا يا بابا أنا جاي أهو ..

لماذا تحب والديك
مش عشان بيأكلوني وبيشربوني لأني مش عايش معاهم

الصلوات المفروضة
أصليها في المسجد كلها قدر المستطاع

لو شفت كلب في الشارع
وأنا مالي

رأيك في صاحب المدونة
أخويا وصاحبي وكفاءة

ناوي تتوب؟
الله المستعان

عندك ايميل
هوتميل- جي ميل - ياهو .. نعم فيه حاجة ؟؟!!!

بقالك على النت من امته؟
من 2001

بتحب تصيف في
مش باروح مصايف ياعم بص لأحوال المسلمين مصيف إيه

أنت
مسلم الحمد لله

أنت
مسلم الحمد لله
:)

متى كانت آخر مرة ركبت فيها أتوبيس
من ساعتين كده

معدل استهلاكك للميه
هو فيه إيه ؟؟

بتاكل كم وجبة في اليوم
ما قلنا مرة واحدة .. دا ايه دا

هل تفضل الزواج من
واحدة ست طبعا

لو شفت راجل بيرقص في فرح
بنظر إليه نظرة ريب واقول واأسفا على الرجولة

أي هذه المدونات تأخذك إلى عالم الجاهلية...والعصور الوسطى
أنا اصلا من العصور الوسطى

هتعمل إيه في العيد
حاكل لحمة

أي هؤلاء المشايخ تحب أن تستمع له
وجدي غنيم

تتوقع كم بلغت ذنوبك منذ التكليف
إحم إحم .. أيوا يابابا حاضر حاضر ثواني بس اكمل الاسئلة وجاي

أيهم تحب
بيض بالبسطرمة

نسألكم الدعـــاء...
تدفع كام وأنا أدعيلك

خلاص أي خدمة تاني ؟؟؟
اتفضل عندي بقا في تاج في انتظارك يا باشا

ammola يقول...

كام رغيف فى اليوم...نص رغيف وشوية رز او مكرونة
العلمانى...شخص منحرف فكريا وعقديا
السلفى..على السنة
الدين ...منهج للحياة
اوقات فراغى..افكر فى ذنوبى
اكل مرتين يوميا
افضل الشاى مع اى شىء لانى مش باحبه لوحده
اذا رايت متبرجة..اقول الحمد لله الذى عافانى مما ابتلاك به وادعو لنفسى ولها بالهداية
عندما استيقظ من النوم اقعدشوية اعمل برنامج لليوم كله ولاممكن حاجة تلخبطه
اصلى على النبى-صلى الله عليه وسلم-مرات متعددة
احب والدى لانى باحبهم-رحمهما الله-ولان الله امرنى بذلك
الصلوات المفروضةاكيد باصليها فى البيت
لو شفت كلب فى الشارع...جربت مرة انى اجرى وطبعا الكلب سبقنى وكانت كارثة مجتمعية..حاليا باستخبى وراأى حاجة لغاية ما ربنا يفرجها
رايي فى صاحب المدونة...وعلشان ربنا حيسالنى عن اجابتى ..سلفى بالمسطرة يحاول انقاذ ما يمكن انقاذه وان كان لدى اعتقاد شخصى انه لا يرحب اوى بالوجود الحريمى على مدونته بس معلش بأه استحملنا
بافكر اتوب..كتير بس ذنوبى سابقانى ومكعبلانى..ربنايرزقنا حسن التوبة
اكيد عندى ايميل..هوتميل
بقالى على النت...والله مش فاكرة..مامعاكش قرصين للزهايمر
باحب اصيف فى مصيف لوحدى وياريت يكون قبل الموسم يعنى اول شهر ستة او اول شهر تسعة
الحمد لله انا مسلمة..ومؤمنة
آخر مرة ركبت اتوبيس...السوبر جيت من اربع شهور لو قصدك اللى جوة البلد فالحمد لله مش باتعامل معاه خالص
معدل استخدامى للميه...للاسف شوية كتير بس فى الضرورة اللى انا شايفة انها ضرورة
لو شفت راجل بيرقص فى فرح..السؤال ده شكله رجالى ..الحمد لله مش باروح افراح مختلطة بس لما باشوف راجل بيرقص باقرف اوى
المدونات بتاعت الجاهلية..طبعا الدكتور خالد(: اكيد ولاواحدة منهم
حاعمل ايه فى العيد..ان شاء الله رايحة القاهرة ونفسى اتمرجح بس ليس كل ما يتمناه المرء يدركه وفى كل هذه الاثناء حاكل لحمة على أد مااقدر
احب الشيوخ الى قلبى...جميع من ذكرت وبالاخص محمد حسان
اتوقع ان ذنوبى بلغت عنان السماااااء
ارجو ان تتلقاها رحمة الله
احب اكل البيض بكل الطرق واخص بالذكر السيد بيض بالبسطرمةوخاصة بالسمن البلدى لما يكون مفحفح والعيش البلدى لما يكون مفقع
والله يا اخى انا ادعو لجميع من اعرف من المدونين..بس تدفع كام وانا اركز معاك شوية

العراق صوت الحق يقول...

السلام عليكم ورحمة الله وبركاته
كل عام وانتم بخير د| خالد
أعاده الله بالخير عليك وعلى الامة الاسلامية بالخير و النصر أن شاء الله
أخوك عمر

أمــانــى يقول...

كـل سنة وحضرتك طيب وبالف خير وعافية يارب آمـــــين واعاده الله علينا وعلى الامة الاسلامية بالخير واليمن والبركات

بيتنا القديم يقول...

جيت اقولك كل سنة وانت طيب
ويارب يارب تكون بخير وسعادة
لا تنس فقيراً او يتيماً او محتاجاً في هذا العيد..
لا تنس ان تبادري بالصلح مع من تخاصم
لا تنس قريب او قريبة بزيارة في العيد
لا تنس كف مرفوع ولسان يستغفر وعين تدمع..مع الله في هذا العيد
تك كير
(:

عالمى ازرق يقول...

كل عام وانت بخير
وعيد سعيد عليك وعلى الاسره
وعلى الامه الاسلاميه كلها بأذن الله

Maha يقول...

أضحكتني أضحك الله سنك وأسعدك برؤيته في يوم المزيد :)