السبت، 3 مارس، 2007

نص جنيـــــــــــــــه







مش عارف اقول ايه...
بس لازم اكلم



صحيت من النوم
وقلت لنفسي يا واد يا خالد النهردة بقى تخرج تقعد على النت شوية في السيبر اللي بعيد اللي الساعه فيه بجنيه -اصل اللي جمبنا بجنيه ونص الساعة-وانا بحب اكون اقتصادي
صليت الجمعة ومشيت مشوار طويل جدا..يجي له كيلو ..المهم ركبت عربية ب نص جنيه -لزوم التوفير علشان اروح المكان اللي الساعه فيه بجنيه
المهم ركبت في العربية وبعدين اديت للراجل الجنيه ادالي بقيته نص جنيه قعدت ابص للنص جنيه وكأني عمري ما شفته
ايه ده؟ صورة مين دي؟؟
دى واحد شكله كان ديكتاتور ...الله ...ده شايل عصاية على كتفه ده ولا ايه؟؟؟ وماله حالق لحيته كده ليه زي البنات ..ما علينا قعدت افكر في الجدع ده مينلابس بنص كم ..اكيد الجو كان حر يوم ما صوروه -صوروه ايه يا مجنون مكنش ايامهم تصوير- اه صحيح راحت ازاي مني دي يبقى وقت ما كانوا بينحتوا لسيادته تمثال كان الجو حر..اه اكيد وقت ما كانوا بينحتوه... وايه ياربي اللي على راسه دي؟؟دي حلة طبيخ؟؟ مراته كانت ممشياه ع العجين ميلخبطوش؟؟؟ وكان بيطبخ ويغسل والكلام ده؟؟؟
يمكن يا واد يا خالد كده
اه اكيد حلةاستنى يا متخلف...مكنش ايامهم حلل حديد...امال ايه دي؟؟دي اكيد خوذة اه خوذة حتى بص عليها تعبان كوبرا من قداميكونشي الراجل ده ساحر ومعاه تعابين وكده؟؟لا مش معقولاستنى استنى ..ده شكله زي البنات خالص..يكونشي واحدة ست من بلاد الافرانك اللي بيقولوا عنهم حلوين؟؟؟يمكن الحكومة بتاعتنا هتستورد لنا حريم من بره مصر اصل البنات العوانس في مصر 5 مليون بس....
لا ده مش بنت...ده ممكن يكون راجل له شأن كبير ...يكونشي ده مثلا مينا اللي وحد القطرين؟؟؟ممكن...بس مينا مكنشي مشهور اوي .....اه صحيح ....طيب يبقى ده تحتمس؟؟؟؟لا برضه مكنش مشهور استنى استنى ..شكله مش غريب عليه مش ده الراجل اللي ربنا سبحانه وتعالى قال عنه في القرآن..: ( ويوم تقوم الساعة أدخلوا آل فرعون أشد العذاب) أيوه يا سلام عليك ..هو بعينه رمسيس الثاني ...اللي كان ظالم وديكتاتور وكان مستبد لشعب مصر وكان مستعبدهم وعامل نفسه إله يخرب عقلك يا رمسيس هو انت اللي بتوع الميكروباصات بينادوا عليك طول اليوم ..عباسية ...رمسيس ..نفر واحد رمسيس؟؟؟؟والله واتشهرت يابن الايه وكمان ايه مصورينك على الفلوس؟؟اه صحيح علشان نفتكرك ونفتكر اصلنا -زي مبيقولوا لنا بس لا يا رمسيس انا مش فرعون ولا انا من الفراعنة..ده انا مسلم..وبكرهك علشان ربنا بيكرهك..هو انت بقى اللي آذيت سيدنا موسى وكنت عايز تقتله؟؟؟هو انت اللي بهدلت المصريين؟؟اه يا كافر....اه.... يا عدو الله ....اه يا مجرم اه يااااااني....!!!
وبعدين بصيت له بصه ....




قلت له :بس تعرف ياد يا رمسيس على قد ما انت كنت ظالم ومجرمعلى قد ما كنت بتخاف على دولتك انه حد يحتلها وكنت مأمن الحدود ومكنتش بتسمح لحد يدخل بلادك
هيييييييييههه يللاحتى فرعون ارجل من شوية عملاء...بيبهدلونا زي ما فرعون بهدل المصريين
وبيسجنوا الدعاة والصالحين زي ما فرعون كان بيعمل..وبينفوهم..زيه تمام
وخايفين على عرشهم زيه بالظبط
بس فرعون الكافر ده كان ملك بجد..يعني ملوش اسياد في البيت الاسود الامريكي بيأمروه
يخرب عقلك يا فرعون ..ده انت كان عندك شوية نخوة أهه
فجأة




العربية وقفت بسرعة....حاسب يا اسطى حاسب الله يسهل لك طريقك يا خويا (ده كلام واحد ست كبيرة كانت في الكرسي اللي قدامي)
ايه في ايه؟؟ده كمين
الحوار:




رخصك يا اسطى




السواق : الرخص سليمة يا باشا والحمد لله كله تمام




امين الشرطة: بس انت عندك مخالفة




السواق: انا ليه يا باشا دا حتى راجل مستأيم -مستقيم يعني- وبمشي جمب الحيط




امين الشرطة: عندك مخالفة تحميل خارج الموقف




السواق: يا باشا موقثف ايه منتا عارف ان الحي ده مفيهوش موقف




الأمين: وانا ذنبي ايه يعني؟؟ متدور لك على حي فيه موقف وتحمل منه




!!!!!!!!!!..................!!!!!!!!!!!!
خالد يحدث نفسه ويجري بينه وبين نفسه حوار
إيه ده؟؟ ماله امين الشرطة ده بيزعق كده ليه؟؟؟




خالد في نفسه..أنا مالي يا عم خلليني في حالي احسن يشدوني ع التخشيبة وانا عندي عيال عايز اربيهم..!!!!وبعدين هتعمل مشكلة هتعطل المرور




الله الله..ايه ده يا واد يا خالد




ايه في ايه يا نفسي مالك؟؟




بص كويس لأمين الشرطة ده...!!!!!




خالد: ماله يعني؟؟




نفس خالد: بص بس كويس شايف لحيته حالقها زي البنات ازاي




خالد: طب وانا اعمل ايه يعني؟؟ عايزاني أأمر بالمعروف وانزل اقول له انه حرام حلقها واخطب خطبة في الطريق العمومي اروح بعدها جوانتانامو؟؟ خلليني ساكت احسن ..وبعدين مهما سألوا الشيخ جاد الحق -الله يرحمه - قبل كده عن موضوع مشابه وقال لهم حرام تحلقوا اللحية ومسمعوش كلامه..يبقى هيسمعوا كلامي أنا؟؟؟




نفسه: يا بني ادم مقصدشي كده خالص انا اقصد بص له كويس اوي وبص للراجل اللي في النص جنيه اللي معاك




خالد يبحلق في الصورة وفي الامين ويقول : الله..ايه ده ده بصحيح فيهم شبه من بعض خالصالاتنين حالقين لحيتهم زي البنات والاتنين شايلين هراوة -عصاية يعني- والاتنين كل واحد على راسه خوذة يا خبر ده بصحيح في بينهم شبه كبير جداده حتى الخوذة بتاعت الراجل اللي على الخمسين قرش عليها تعبان الكوبرا من قدام وبتاعت امين الشرطة عليها نسر من قدام والحيوان ده والطائر ده مفترسين
يا خبر يعني الراجل اللي على الخمسين قرش طلع قريب امين الشرطة ده؟؟؟أتاريه عمال يزعق ويهدد وكلام من دهاه بلد وسايط صحيح
التباع للراجل اللي جمبي : نازل فين يا استاذ؟؟




الاستاذ اللي جمبي: المحطة اللي جاية




التباع : طيب هات نص جنيه يا استاذ




الاستاذ اللي جمبي: نص جنيه ايه يا اسطى حرام عليكوا انتوا كده بتغللوا على الناس اتقوا الله فينا




التباع: نعمل ايه بس يا استاذ والله انت متعرف اللي فيها.كل اسبوع بتدفع تلاتين اربعين جنيه ..كماين زي منتا شايف نجيبهم منين يعني؟؟ وبعدين يا استاذ البنزين غلي خالص هو حضرتك مبتقراش جرانين -جرايد يعني-؟؟!!!




الاستاذ -متعاطفا مع التباع- لا يا بني انا مش لاقي اكل هاجيب جرايد كمان؟؟ يللا الحمد لله
امين الشرطة شاف النص جنيه من هنا وقال له : اهلا ازيك يا جدو
وهنا حدث امر خطير: خالد ينتشي فرحا وسرورا في كرسيه ويعدل ياقة القميص بافتخار ويقول لنفسه: شفتي ..مش انا قلت لك فيه صلة قرابة بين امين الشرطة وبين الراجل اللي على النص جنيه؟؟؟
اهه بلسانه لسه قايل له : يا جدويعني طلع امين الشرطة ده متعين في مكانه بواسطة..وكمان من عيلة كبيرة وصورة جده على النص جنيه
يا سلام يا واد يا خالد على نباهتك وذكائك ..فعلا كنت تستحق ال99 وتلات تسعات اللي اخدتهم في الثانوية
شاطر يا واد وبتعرف تستنتج
خالد : يتكلم بصوت من غير مياخد باله : بقى امين الشرطة والراجل ده قرايب؟؟!!!! يا خبر...!!!




قطع كلامي ضحكة صبي في ال12 او ال13 من عمره بيبص لي باستغراب




قال لي : يا عمو انت مش من مصر ولا ايه؟؟




قلت له : لا من مصر




قال لي: امين الشرطة ده يا عمو مش قريب الراجل اللي على النص جنبه اللي مع حضرتك




خالد:ازاي ؟؟؟!!! ده لسه قايلله يا جدو من شوية
الصبي: ههههه يا عمو احنا المصريين فراعنة وأجدادانا هم الفراعنة وعلشان كده التباع بيقول للراجل اللي على النص جنيه يا جدو فهمت يا عمو؟؟




خالد: اه فهمت يا حبيبي...جزاكم الله خيرا




الصبي: ههههه يا عمو ايه الكلمة دي؟؟ المفروض نقول ميرسي او سانك يو




خالد يدور في راسه فكرة سريعة: ايه ده؟؟؟ هو انا في مصر ولا في اوروبا؟؟
خالد للصبي: لا يا حبيبي..بص احنا -المسلمين- لما حد يعمل لنا حاجة كويسة ..لازم نقول له زي ما الرسول علمنا جزاك الله خيرا..والتاني يرد عليه ويقول له : وإياكم
الصبي: بجد؟؟ هو الرسول قال كده؟؟




خالد: ايوة يا بني قال كده انت عمرك ما سمعت دي قبل كده؟؟




الصبي: لا والله عمري ما سمعت




خالد: وبعدين احنا يا حبيبي مسلمين وأحفاد هم الصحابة مش الفراعنة ..وعملت بقى فيها الشيخ الحويني وقعدت اقول له الأيات والاحاديث اللي بتقول ان الفراعنة دول كانوا كفار وانهم هيدخلوا النار لما القيامة تقوم وانهم اعداء الله وانهم اعداء الانبياء..وده مش معناه يا حبيبي اننا بنكره مصر..لا..احنا بنكر ه الفراعنة لانهم كانوا أعداء لربنا -سبحانه وتعالى-
الصبي -فاتح بقه- وكأنه اول مرة يسمع الكلام ده : بس يا عمو نا اول مرة اسمع الكلام ده , هم ليه مش بيقولوا لنا الكلام ده في المدرسة وليه مش بيخللوه يبقى مقرر علينا؟؟ وليه عمالين يقولوا الفراعنة ...الفراعنة واحنا احفاد الفراعنة ؟؟؟؟
خالد: أصل يا حبيبي الدول الصليبية الكافرة زي امريكا واوروبا واليهود عايزين يحتلوا مصر ..و كل بلاد المسلمين وينشروا فيها النصرانية والكفر لانهم بيعتقدوا ان المسيح -عليه السلام- هيرجع وهم يعيشوا معاه الف سنة لو هم احتلوا بلادنا وقضوا على المسلمين واديك شايف اللي بيحصل في العراق وافغانستان و فلسطين وقريب اوي مصر متقلقشي ..
الصبي: بس يا عمو دول عندهم اسلحة قوية ولو عايزين يحتلونا هيحتلونا
خالد في نفسه -وبعدين بقى في الفكر الانهزامي اللي سيطر على عقولنا ده-؟؟بص يا حبيبي: هم حاولوا قبل كده مرات كتيرة انهم يحتلوا بلاد المسلمين بس فشلوا -والحمد لله- يعني صلاح الدين مثلا طردهم أذلاء منها وبعدين جه بعد كده الحملة الفرنسية على مصر وكان القائد بتاعها نابليون بونابرت وده كان قسيس نصراني وحاول احتلال البلاد بالقوة وكان جاي يعمل اللي جورج بوش بيعمله الوقتي لكنه فشل هو كمان
الصبي: بس يا عمو ده عندنا درس في الدراسات الاجتماعية بيقول : مميزات الحملة الفرنسية على مصر..و....مساوئ الامبراطورية العثمانية




خالد: بص يا حبيبي ده من ضمن حملة التغريب اللي انا بكلمك عنها هما عايزين يغزو افكار المسلمين ويربوهم من البداية على الفكر الانهزامي وعلى حب الغرب وكراهية الاسلام علشان لما يحتلوك فكريا يبقىسهل بالنسبة لهم بعد كده انهم يحتلوك عسكريايعني يقولك مميزات الحملة الفرنسية علشان تحب الغرب وينشأ في نفسك من وانت طفل صغير ان الناس دي ليها مزايا لما جات بلادنا..اذن لما ييجوا بلادنا تاني لازم نرحب بيهم علشان مزاياهمولازم وفي نفس الوقت يقول لك عيوب الخلافة العثمانية ويسموها الامبراطورية العثمانية علشان لو سمعت انو حد بيقول مثلا الحكم بما أنزل الله أو الخلافة الاسلاميةترد على طول وتسمع وتقول لهم : انتوا بتقولوا ايه؟؟انتوا عايزين ترجعونا تاني لعصر الامبراطورية اللي كان ليها عيوب و...عصور التخلف الوسطى والإرهاب...؟؟؟!!!!
الصبي: ميرسي اوي يا عمو...سوري ..اقصد : جزاك الله خيرا...يووه معلشا انا اسف..اقصد جزاك اتلله خيراانا نازل بقه يا عمو...وهقول لكل اصحابي في المدرسة على المعلومات الجميلة دي وكمان هقولها لبابا وماما واخواتي
خالد: ربنا يوفقك يا حبيبي انت كده هتكسب حسنات كتير وهتبقى من اللي بيأمروا بالمروف وينهوا عن المنكرالصبي: شكرا يا عمو...سلام عليكم ورحمة الله وبركاته




خالد: وعليكم السلام ورحمة الله وبركاته
خالد يستند الى خلفية الكرسي ويدور في راسه عدة افكار: بقى للدرجة دي المسلمين في مصر مضللين وضاحكين عليهم؟؟




يا خبر , يظهر ان الموضوع كبير والخطر اكبر مما كنت اتصور




وبعدين ليه يعني يحطوا صورة رمسيس ده على النص جنيه؟؟؟يمكن علشان يفكرونا باننا فراعنة واننا ملناش اي صلة بالاسلام وان ده اصلنا




ولا يمكن علشان يفكرونا باللي فرعون كان بيعمله في المصريين علشان لو اي حد فكر فكرة كده ولا كدهيفتكر على طول انه ممكن اوي يحصل له زي ما كان بيحصل للمصريين على ايد فرعون؟؟




من باب (اضرب المربوط يخاف السايب)؟؟ليه مثلا ميحطوش على النص جنيه صورة للحرم المكي او الحرم المدني؟؟ولا ليه ميحطوش صورة على النص جنيه للجامع الازهر؟؟؟قلبت النص جنيه ولاقيت مفاجأةعارفين لاقيت ايه؟؟؟لاقيت الصورة دي















هناك 3 تعليقات:

Islamist Bloke يقول...

ما شاء الله عليك

بس انت عارف احنا حالتنا النفسية دلوئتى سوداوية جدا ومش ناقصين يا دكتور

فعلا كل كلمة قلتها بنحس بيها بس بنقابلها بصمت واسى وزهق بيزيد يوم بعد يوم

وجزاك الله خيرا انك عبرت عن اللى فى نفوسنا
وصدقني انت بتقول كدة عشان طفل غريب فى ميكروباص لكن الكلام ده صدقني بيوجع اوى اوى لما تلاقيه من ابن اختك او ابن اخوك او والدك ووالدتك واخواتك

الطريق طويييييييل يا د\خالد

وياريت تحضر اجتماع المدونين عشان نتعرف بيك

شكرا

خالد وليس بخالد يقول...

شرفت المطرح يا جميل...بس ايه حكاية اجتماع المدونين؟؟؟

بانتظارك

غير معرف يقول...

مدري ليش قاهرتكم فلوس ال سعود وعندنا ملايين العمال المصريين فاتحين بيوتهم منها وتلاقيك ياعيني ياإما ما قدرت تاخذ فيزا او ابوك وبيصرف عليكم من بلد الخير السعودية

ماراح تطلع اديب اذا ماعندك ادب من اساسه يابيه وانتبه للناس ألـــســن