الخميس، 8 مارس 2007

الوش التاني من ورقة النص جنيـــه


سلام عليكم
وحشتوني جدا

نكمل بقى بقيت المشوار اللي شكلنا مش واصلين فيه
وقفنا لحد فينا؟.؟

فكروني...اه لحد ما قلبت النص جنيه ولاقيت عليه صورة الأزهر الشريف -حبيبي-
إي والله بحب الأزهر ده وبيصعب عليا كتير أوي أوي
المهم دققت في الصورة وكأني لأول مرة اشوف الازهر -مع اني تقريبا كل اسبوع باشوفه مرة-
يا سلام المسجد الثاني في العالم اللي المئذنة بتاعته بمئذنتين
مسجد جميل جدا من جوه وكمان من الخارج
لكن لما تبص له الوقتي يصعب عليك
إهمال إهمال رهييب وده برضه من ضمن خطة التغريب ...هم بس اصلهم شاطرين يهتموا بترميم التماثيل والأصنام والمعابد لأربابهم الفراعنة ..إنما بيوت الله ...لأالله المستعان
قعدت أتذكر تاريخ الأزهر الشريف منذ نشأته ياااه ده من زمااان أوي ..





من سنة 359 هجرية 970 ميلادية أنشاه القائد الشيعي الباطني الفاطمي الفاجر جوهر الصقلي بأمر من سيده الخليفة الرافضي المعز لدين الله الفاطمي -أذله الله-والحقيقة يا اخواننا ان الشيعة ما أنشأوش الازهر كده علشان سواد عيون المصريين إنما أنشأوه في الاساس لتثبيت دعائم دولتهم الرافضية التي تقوم على هدم الدين وسب اصحاب النبي وزوجاته وتكفيرهم الا ستة المهم مشيت بذاكرتي مع الازهر يااه قعدوا يبنوا فيه سنتين واول صلاة اتصلت فيه هي صلاة الجمعة ويااه يا واد يا خالد...معقولة؟؟الشعب المصري البطل المتدين طرد الدولة الشيعية الفاطمية من مصر - رجالة والله-طردوهم لأن أهل مصر بيحبوا آل البيت والصحابة جدا -ودي حقيقة- لذلك ربنا -الحمد لله - حمانا من شر الشيعة حتى اليوم -لكن لا ندري ماذا نفعل غدا-...!!!!ربنا يستر






عقلي يشتغل ويمشي خلال السنين وبلاد تشيلني وبلاد تحطني ويااه رحمة الله على الشيخ ابو بكر بن النابلسي الشيخ العالم الفقيه السنيده بأه قصته عجيبة جداالعالم ده كان من علماء مصر الثابتين على المنهج الصادعين بالحقوبعدين جوهر الصقلي جابه وقال له : بلغنا انك قلت , اذا كان معك عشرة اسهم وجب أن ترمينا بتسعة وترمي الروم -يعني الصليبيين- بواحدشوفوا بقى الرجل العالم لما يقف في وجه سلطان ظالم يرد يقول ايه؟؟ -الكلام ليكي يا جارة-
احم احم





قال له : انا ما قلت هذا , بل قلت ..اذا كان معنا عشرة اسهم , وجب ان نرميكم بتسعة ونرمي العاشر فيكم ايضا فإنكم قتلتم الصالحين وبدلتم الملة
فالمهم جوهر الصقلي -الله لا يرحمه- أمر واحد يهودي انه يشرح القائد أبو بكر بن النابلسي بالموس وفعلا بدأ اليهودي ده يشرح من مفرق رأسه..وكمل سلخ لوشـه -رحمه الله ورضي عنه- لغاية ما وصل لصدره صعب على اليهودي -اه والله صعب على اليهودي- قام اليهودي علشان يخلصه من العذاب اللي هو فيه ضربه بالسكين في صدره ..فمات -رحمه الله- والغريب ان احد العلماء ممن حضروا الواقعة دي قال..: كنا نسمع القرآن من صدره وهو يقول : (كان ذلك في الكتاب مسطوراً) سبحان الله قصة مؤثرة مش كده؟؟؟بس على فكرة دي مش من اختراعي ..دي أوردها الامام الذهبي في كتابه الكبير -سير أعلام النبلاء- في ترجمة الشيخ أبو بكر بن النابلسي





خلاص خلاص متعيطوش
المهم -انا عكرت دمكم- معلش..بس دي قصة من قصص الشيعة مع علماء مصر ..لما دخلوها ..واكيد زي كده واكتر منه بيعملوه في العراق يللا ربنا يسترالمهم بعد ما الشيعة اطردوا مدحورين أذلاء من أرض الكنانةافتكرت سلطان العلماء -العز بن عبد السلام- وده كان اول أشهر علماء الازهر على الاطلاق-ورحمة الله على الامام العز..كانت كلمته مسموعة عند السلاطين..وهو اللي كان يقول يمين لوالي مصر يبقى يمين..شمال يبقى شمالوالشعب المصري كان بيحبه جدا جدا..إييييييييه يا زمان..اتقلب الحال والله المستعان





بس هقولكم قصة تانية جامدة مووت وحصل في العصر الحديث





كان الشيخ الحلبي وده كان عالم الشام في زمانه





دخل عليه إبراهيم باشا -جبار الشام في زمانه- وابراهيم باشا ده كان من ابناء محمد علي باشا





المهم ابراهيم ده دخل على الشيخ الحلبي والشيخ ممدد رجليه وهو بيشرح للتلاميذ بتوعه ..علوم الشريعة وكده





وطبعا لما ابراهيم باشا دخل...العالم الكبير الابي ملمش رجليه ...-مع ان ده ابن الريس ساعتها-





فالمهم ابراهيم باشا اضايق جدا





وبعد ما مشي بعت له مع واحد كيس فيه ذهب





فالشيخ الحلبي رد الرسول وقال له : قل له إن من يمد رجليه , لا يمد يديه





شوفتوا عزة العالم المسلم.؟؟
رجعت بضهري لورا اركنه على الكرسي ..حسيت بايد صغير ورا ضهري بصيت لاقيت ايد طفل صغير واد أمور اوي اوي -شبهي وانا صغير- امه شايله والواد بيضحك لي ..دعيت له ربنا ينصره بالاسلام وينصر الاسلام به ...
المهم شليت ايد الواد و فضلت اسبح-أعوم يعني- في الماضي البعيد وافتكرت الازهر ودوره البطولي في الجهاد في سبيل الله ضد اللي كانوا عايزين يحتلوا اي جزء من بلاد الاسلام -مش من مصر بس....!!لعنة الله على سايكس بيكو وعلى افرازات القومية العربية
الازهر ده يا صحابي للي ميعرفوش انطلقت من على المنبر بتاعه صيحات الجهاد ضد الصليبيين والتتار
وبرضه الازهر الشريف انطلقت منه دعوة الجهاد ضد الحملة الفرنسية الصليبية التبشيرية اللي كانت بقيادة القس نابليون بونابرت نابليون وجنوده عليهم لعنة الله ..اللي دخلوا الازهر الشريف بالخيول بتاعتهم ودنسوه بوجودهم فيه -بالظبط زي ما امريكا وبريطانيا الصليبييتين بيعملوا في العراق الوقتي بمساعدة اخوانهم الشيعة-
نابليون بونابرت وجنوده اللي اغتصبوا المصريات وانتهكوا اعراضهم وحرماتهم وسرقوا البيوت ..- اه يا قلبي ..زي ابو غريب وأم القصر-
ما أشبه الليلة بالبارحة لكن بعدها الازهر قام بدوره القوي وانطلقت منه ثورتين متتاليتين ضد حملة نابليون الصليبي الأولى كانت في اكتوبر سنة 1798 م والثانية كانت في مارس 1800 م
تسيبنا بقى من المشاكل والخناقات والحروب ونتوجه لطلبة العلم اللي كانوا في الازهر
بصراحة يا واد يا دكتور خالد..كانوا بصحيح طلبة علم مجتهدين مفيهمشي بلادة زي اللي موجودة في كتير من طلبة العلم النهردةوكان لهم اسم غريب كان اسمهم (المجاورين) ودول كانوا بييجوا من كل مكان في العالم ويتعلموا في الأزهر الشريف
ممكن ياخويا تتاخر لو سمحت؟؟؟ أصلي نازلة المحطة الجاية... (الست ام الواد الامور اللي شبهي وانا صغير ايام العز يعني)
اتفضلي ...متحاسب يا اسطى انت متسربع على ايه ؟؟؟ الست تنزل بس -ده طبعا كلام واحد ورا السواق علطول علشان الست تنزل-
وواحد جمب اللي ورا السواق..ممكن بعد اذنك يا اسطى توطي الاغنية دي شوية ؟؟؟ليه يا شيخ -اصله أخ ملتحي- ؟؟؟الاخ الملتحي: اصل فيها موسيقى وانا بقرأ قرآن السواق : طيب يا استاذ دي اصلا مش اغنية حب ولا كلام هايف من ده ..ده أغنية دينية وحتى اللي بيغني بيقول مدد مدد مدد مدد يا رسول الله..آمنت بالقرآن....
خالد متعجبا -طبعا بدون ما اتكلم لاني لو اتكلمت حاجة من 2 يا اما هتبقى فيه خناقة لان عقبال عندكم السواقين في مصر خلقهم ضيق ..معرفشي ليه- وبعدين أبو زعبل وليمان طرة معتش فيهم مكانفالدولة هتضطر تبني معتقلات جديدة للي زيي ...وأنا طبعا -وحفاظا على المال العام للدولة- مرضاش انها تضيع فلوسها في انها تبنيمعتقلات جديدة للي زي حالاتي فقلت اسكت
لكن قلبي ارتجف وقلت لنفسي -انت هتستهبل؟؟ عامل نفسك بتحافظ على المال العام؟؟- قول ان انت جبان خايف تأمر بالمعروف وتنهى عن المنكر..خايف تحصل الشيخ (....) اللي مسجون بلا تهمة من حوالي 7 شهور وموجود في ابو زعبل على الفاضي من غير اصلا ما يثبتوا اسمهانه في المعتقلين





لما تقابل ربنا يوم القيامة هتقول له ايه؟؟ هيقولك يا عبدي كنت خايف منهم ومش خايف مني؟؟؟ساعتها هتقول ايه؟؟؟قلت لنفسي لازم أأمر بالمعروف وبالتي هي أحسن .. دعيت ربنا انه يوفقني ..وطلعت قعدت في الكرسي الوحيد اللي جمب الاخ الملتحي يعني جمب الباب على طول...وحيث اني ريشة فممكن اي شوية هوا يطييروني المهم ..الاخ الملتحي اللي جمبي لاحظ اني قعدت جمبه..فابتسم من الاحراج -لانه حس اني جاي من الكوواليس الخلفية علشان أؤدي عملية -انتحارية-....!!!





قلت له: يا اسطى -الله يكرمك الاغنية دي محرمة لان بها شرك





الاسطى : شرك ايه يا استاذ ؟؟





الداعية المخضرم -خالد- :المغني ده بيقول مدد يا رسول الله...والكلام ده مينفعشي





السواق: ليه؟؟ دا النبي يا استاذ النبي..!!!!!عارف يعني ايه النبي؟؟





الداعية اللبق خالد: مقلناش حاجة يا اخي الكريم..لكن النبي-ص- ربنا أمره في القرآن الكريم انه يقول قل إني لا أملك لكم ضرا ولا رشد)





ايعني انا ما املكشي اني اضر حد ولا انفعه يبقى بالتالي مينفعشي نقول مدد يا رسول الله ,وبعدين ربنا -سبحانه وتعالى- أمر النبي -ص- انه يقول ..(قل اني لن يجيرني من الله أحد ولن أجد من دونه ملتحد)





يعني النبي -ص- بيقول لنا : يا مسلمين انا ما املكشي لنفسي اي شئ..فاذا كان النبي ميملكشي لنفسه شئ...يبقى هيملك لي او ليكي او لغيره المدد؟؟





السواق : طأطأ راسه من الاحراج...





الداعية الفريد من نوعه خالد حب يتدارك الموقف علشان ميحرجشي السواق : الموضوع بسيط ومفيهوش احراج..انا برضه كنت زي حضرتك كده..لكن واحد من اهل الخير قال لي الكلام ده وبالدليل فاقتنعت بيه جدا والحمد لله معتش باسمع..





السواق: ربنا يكرمك يا استاذ





وقام طافي الشريط





خالد في نفسه : الحمد لله ..يارب تقبل مني ولا ترد عملي على وجهي واجعله خالصا لوجهك الكريم.
نرجع بقى للمجاورين ..عارفين مين دول؟؟ محنا لسه قايلين من شوية (دول الطلبة اللى كانوا بييجوا من بلاد بعيدة علشان يتعلموا في الجامع الازهر) وكان المسجد فيه تقريبا 309 عمود او حاجة زي كدهوكان تحت كل عمود عالم من علماء الاسلام بيدرس في فن من الفنون -استنوا بس ..الفنون مش معناها فيفي عبده ونور الشريف والعالم دي-الفنون يعني العلوم يا اخواننا..دماغكوا متروحشي لبعيد
وبعدين كل طالب علم او

أبو زيد ماشي بيتمختر.....





لا الزير ولا عنتر..وقع الأسد ع الصوان وأبو زيد بيبرم في أشنابه





-شنباته يعني-ده كان مقطع من اغنية لواحد مصري اسمه سعد الشاعر- جدع بتاع موالد وكلام من ده بيخترع قصص وهمية عن البطل المغوار والمغامر الجبار وصاحب السيف البتار أبو زيد الهلالي سلامه-وبيضحك بيها ع المساكين وطبعا الموسيقى معاها






خالد يعاود الكرة على السواق -عامل نفسي مش عارف-:





بقولك ايه يا اسطى..مش ده برضه سعد الشاعر؟؟





السواق : هو بعينه يا استاذ ده ما شاء الله عليه شيخ جميل اوي و...





خالد في نفسه.: اه مهو من اصلاب الصوفيه يبقى لازم يتقال عليه شيخ





خالد: بس يا اسطى انا كنت بسمع الجدع ده وانا صغير وكنت باعجب بالقصص بتاعته اوي..لكنها خيالية جدا وبعدين معاها موسيقى





السواق: يا استاذ الموسيقى دي مش حرام...لانها مش مثيرة..دا انا سمعت في التلفزيون الشيخ(....)والدكتورة(...)بيقولوا حاجة كدة مش عارف مليانة حسنات ..يعني باين بيقولوا حسنه حسنه او حاجة زي كده





خالد في نفسه -ايه ده؟؟ السواق مثقف باين عليه





خالد: اه تقصد الموسيقى حسنها حسن وقبيحها قبيح...





السواق : الله يفتح عليك هي دي..





خالد -في نفسه- : وبعدين بقى في المفتين اللي بيمشوا بهواهم وبمزاجهم ومن غير اي دليل ..اهو هتيجي تكلم السواق هيقولك يعني انت هتعرف اكتر من دول؟؟ وهيقولك الاسطوانة المنسوخة..علقها في رقبة عالم...تطلع سالم...
خالد : بص يا اسطى الكلام اليل بعض العلماء بيقولوه في الغناء ده معليهوش دليل... والموسيقى حرام مطلقا ومفيش حاجة اسمها موسيقى اسلاميةاو اغنية اسلامية, ممكن يبقة فيه نشيد اسلامي من غير موسيقى..اه ممكن نسمعه لو مفيهوش مخالفات..وبشرط منفضلشي نسمعه على طول ونسيب بقى القران ...والنبي -ص- بيقول : (يأتي زمان على امتى يستحلون فيه الحرا والحرير والمعازف والخمور) يعني اهه بكلام النبي-ص- انها كانت حرام فحللوهاوالحديث ده يا اسطى في صحيح البخاري
السواق: لكن دول علماء ومن الازهر يا شيخ





خالد: يا أسطى أنا أزهري أنا كمان...وقعدت في الازهر 17 سنة ....من أول الابتدائية لحد اخر سنة في كلية الطب





السواق: هو حضرتك دكتور؟؟





خالد : آ يوه





..السواق: معلش يا دكتور انا اسف..بس انت عارف احنا بناخد كلام الناس بتوع الازهر ثقة..





الاخ الملتحي اللي جمبي بصيت له بصه وعينيا كلمت عينيه ومغزى الكلام..عيب عليك لما متأمرشي بالمعروف





الاخ اللي جمبي طلع شريط من جيبه





وقال للاسطى : خد يا اسطى شغل الشريط ده نكسب منه حسناتالسواق ياخد الشريط ويشغله ..ونسمع صوت حبيبنا الشيخ يعقوب





وانا قلت لنفسي سيبوني بقى اكمل احلام اليقظة شوية
نكمل بقه؟؟وقفنا لحد فين؟؟؟





اه كنا بنقول ان المجاورين





(طبعا انا مش هقولكم ان المجاورين هم الطلبة اللي كانوا بييجوا عند الازهر علشان يتعلموا هناك) ودول بقى كانوا مساكين وفقراء جدا وكانوا بيعيشوا جمب الازهر والحي اللي هناك حي شعبي جدا والعشوائيات ملياه..مع ان المفروض يهتموا بيه
وكانوا مش بيلاقوا ياكلوا ومع كده كانوا بيبقوا علماء و طلبة علم أشداء وفطاحللكن الوقتي تعلى بص..الطلبة بتقعد في المدينة الجامعية تاكل الفول اللي بزيت الخروع-معرفشي السر في زيت الخروع ايه..لو حد عارف يقول لي- وياكلوا ويناموا ياكلوا....





يومين في الاسبوع بيض ويومين لحمه و 3 ايام فراخ وطبعا بيجيبوا لهم فاكهة..برتقال او موز تبع المتاح...وفي الصيف بيجيبوا لهم عصير ...مهيصينهم ع الاخر....ناقص بس يعملوا لهم حمام سباحة في وسط المدينة ويجوزوهم..ومع كده الطلبة كلها -تقريبا- الا من رحم الله بيطلعوا ولا علماء ولا حتى طلبة علم
عارفين ليه؟؟ انا عن نفسي معرفشي اللي يعرف يقول لي برضه..
نيجي بقى للعصر الحديث ..انا بصراحة مش هتكلم عن الازهر ولا عن طلبة الازهر ولا عن شيوخ الازهر ولا عن اي حد





طبعا لاسباب مش هقولكوا عليها وهي انهم اكيد مراقبين المدونات :)





فخلينا ماشيين جمب الحيط أحسن
بس هفتكر مثال طيب جدا





الشيخ عبد الحليم محمود-رحمه الله وعفا عنه - شيخ الازهر ايام حرب 73 ده كان شيخ الازهر ..عارفين كان بيعمل ايه؟؟؟ بصراحة خالتي هي اللي قايله لي المعلومة دي لانها كانت في قسم التفسير في الجامعة وقتها
كان يقف على باب الجامعة ومعاه خرزانة-يعني عصاية بتلسوع ...يعني بتضرب صعب يعني- وكانت البنت اللي متعجبوش في لبسها او يحس انها مش كويسة في مشيتها على طول ينزل عليها بالخرزانة وهكذا كل يوم الصبح..الله يرحمه





وفاكر انا بقى موقف حكاه الشيخ الحويني في خطبة ليه عن الشيخ جاد الحق -رحمه الله- انه لما راح ماليزيا أو أندونيسيا -مش فاكر بالظبط-الشعب الماليزي المسلم شال السيارة بتاعته من على الارض يعني رفعوا الشيخ بالعربية من على الارض وشالوه بالعربية على كتافهم من حبهم ليه وكانوا بيتسابقوا على اللي يشيل الشيخ بالعربية





فلما الشيخ جاد الحق -رحمه الله- شافهم كده قال لهم : يا اخواننا نزلوني , أنا راجل كبير في السن ولو العربية وقعت ولا كده الله اعلم هيحصل ايه
بصراحة الراجل ده لما مات كان يوم حزين جدا وسبحان الله..العلماء ماتوا في فترة زمنية متقاربة...الشيخ جاد الحق والشيخ الالباني وابن باز والعثيمين والشيخ الغزالي...-رحمة الله على الجميع-
المهم نرجع بقه لحال الطلبة في الازهر..حال ما يعلم بيه الا ربنا -سبحانه وتعالى- شباب ضايع وبلا هدف -الا من رحم الله-مع انهم ممكن يذاكروا ويتفوقوا ... ميعرفوش انهم هم دول امل مصر....وهم اللي ممكن يخلصونا من الظلم والطغيان اللي واقع علينا ..لانهم حملة الدين..واذا اجتمع الدين مع التفوق فيا حبذا هذا الرجللكن الله المستعان ربنا يهدينا ويهديهم
لكن ارجع واقول ان الازهر الوقتي -ولله الحمد- بيشهد صحوة كبيرة جدا انا لمستها...بس ربنا يبعد عنهم القوم الظالمين
اتحرك عقلي بصرعة من مدينة نصر لحي الحسين -حيث الجامع الازهر الشريف..وبصراحة لي انا ليه مع الجامع ذكرى ...من حوالي 4 سنين قلت لاخويا ..على فكرة هيبقه فيه مظاهرة جامدة بكرة في الازهر علشان احتلال العراق ...يللا بينا بكرة نروح...قال لي ماشي





المهم رحت انا وهو وشاركنا في المظاهرة..وكنت اول مرة في حياتي اعرف ان فيه حاجة اسمها (النمل المركزي) مش الامن...هم فعلا من كترهم تقدر تقول عليهم النمل المركزي
وطبعا بعد صلاة الجمعة الزعيق في الجامع و الهتافات والاعلام اللي بتتحرق ....والقنوات التليفزيونية وانا طبعا كنت بزعق باعلىصوتي بس الكلام ده طبعا كان قبل ما اعرف ان الحكم الشرعي في المظاهرات دي انها غير جائزة..وده سمعته من الشيخ محمد حسان ومن الشيخ الالباني طبعا الزعييق في الجامع من الستات كمان بتبقى حاجة وحشة اوى ....





لكن ما علينا
والغريب انه في الوقت اللي الازهر فيه مهملين فيه جدا جدا واللي عايز يتاكد من كلامي ده يروح الازهر..بس يشوفه من ورا..من عند المكتبات وكدة..درب الاتراك يعني هتلاقوا انهم مهملين جدا..مع انهم بيصرفوا على المسارح والكباريهات بالملايين...لكن الأزهر لأ





وهنا افتكرت كلمة لواحد قسيس من النصارى كان اسمه زويمر ..قال في اجتماع للمنظمات التنصيرية(التبشيرية) في العالم :(إذا أردنا أن نغزو الشرق فلا بد من أن نهدم أربعة ِأشياء; الكعبة والأزهر وصلاة الجمعة والحج ...)





عرفت ليه بقى ها عايزوين يهمشوا دور علماء الازهر...ويمشوا في ركب العلمانية ويفصلوا الدين عن الدولة...ويقولك : احنا عايزين الدين شعائر بس ..تبقى تعملها في الجامع, انما لما تخرج بره الجامع تنسى كل ده..طبعا الجهلة دول مقرأوش الاية دي..أو قرأوها ومفهموهاش , أو فهموها و بس لحقدهم وضلالهم عاندوها (قل ان صلاتي ونسكي ومحياي ومماتي لله رب العالمين)يعني جوا الجامع , بره الجامع , صاحي , نايم , عازب , او حتى اثناء اللقاء مع الزوجة او حتى في الخلاء او حتى وانا باكل...كل اوقاتي دي لله واجددد نيتي واكون في عبادة دايمالكن نعمل ايه؟؟قاتل الله الليبرالية والعلمانيةوبمناسبة الازهر والليبرالية (التحررية) افتكرت الملحد الكافر الزنديق كامر عامر-المدون المصري - الطالب اللي كان في سنة تانية شريعة وقانون اللي نزل سب في الله وفي الرسول عى مدونته ويقول في احد موضوعاته
(لا اله الا الانسان)





..حتى انا سمعت لقاء ليه مع واحد -يبدو انه ملحد هو كمان-بيقول: نلتقى الان مع المفكر والاستاذ كريم عامر





اه يا ولاد الايه..الوقتي بقى استاذ ومفكر؟؟؟؟علشان تنصر او بقى كافر ووليبرالي زيكم؟؟والاستاذ المفكر كريم عامر يقول له : انا لا اؤمن بالاله...وانا قلت في مقالي ان الاله ده كائن هلامي ....





كبرت كلمة تخرج من أقواههم إن يقولون إلا كذبا





حقيقي انت عدو الكريم..مش عبد الكريم ربنا يثبتنا على الايمان يا رب
انتبهت من تفكيري على كلمة للشيخ يعقوب يقول





: (يابني اتق الله...البنت اللي انت بتبص عليها دي اتهرت بص)
واذا بي اسمع كلمة من واحدة متبرجة قاعدة على الكرسي اللي جمب اللي ورايا -شكلها نصرانية -كافرة يعني-
بتقول بصوت انا بس اللي سمعته واللي جمبي : ايه الارف اللي انت مشغله ده كتك الارف انت كمان
ابتسمت ابتسامة ساخرة وبصيت للي جميب ...لاقيته فهمني
قلت في نفسي: الشيخ غايب الوقتي ..والمفروض من حق المسلم على المسلم ان يرد عنه غيبته ويدافع عنه- يعني امر بالمعروف ونهي عن المنكر-بس ضربتها في دماغي بسرعة لاقيت المفسدة هتبقى اكبر لو انا اتكلمت
خصوصا ان في بلدنا..المسلم بيعيش على هامش الحياة..
والنصراني بيعمل اللي هو عايزه تحت شعار (المواطنة)



قلت لنفسي لو انا اتكلمت هي اكيد مش هتستكت وعلى اقرب كنيسة وهتتبلى عليا...وطبعا مقلكشي بقى..ممكن شنودة يعتكف في الكنيسة لحد ما بنته يجي لها حقها من د/خالد ويبقى ناا بقى عملت فيه الداعية المحترم...بقيت في غياهب السجون



بيني وبينكم قعدت افتكر في الامثال البلدي اللي اتقالت في الجبن علشان



اشجع نفسي بيها اقتكرت (من خاف سلم) والجري نصف الجدعنة وكده يعني..قلت هو ده الصح انا اسكت وارفض المنكر ده بقلبي -واهو اضعف لايمان-
الناصية اللي جاية يا اسطى الله يكرمك - حاضر يا استاذ ...
يبدأ السواق برفع رجله عن البنزين ويحرك الرجل التانية على الفرامل علشان يقف.. ويلف الدريكسيون (عجلة القيادة) يمين علشان يركن لي على جمب ويقول خالد ..سلام عليكم ورحمة الله وبركاتهسبحانك الله وبحمدك اشهد ان لا اله الا انت...استغفرك واتوب اليك انزل من على سلم العربية التويوتا موديل 2006 وابص الاقي










صورة قريبة من الصورة دي




































تحياتي

هناك 4 تعليقات:

أروى الطويل يقول...

اسلام عليكم البوست رائع ودمه خفيف جدا
شكرا لمرورك

خالد وليس بخالد يقول...

الشكر لله

عصفور المدينة يقول...

جزاك الله خيرا بس الموضوعات كثيرة جدا في نفس البوست
خبرتي تقول أن المواضيع إذا كثرت ينسي بعضها بعضا
ولكن الخط واضح جدا

خالد وليس بخالد يقول...

أهلا وسهلا...برزخيات..شرفت المدونة يا أخي

انا قلت اكتب لعامة الشعب الحاجات اللي انا مريت بيها مرة واحدة علشان لما اموت يبقوا يفتكروا الريس بتاعهم بالخير...يللا الله المستعان

شكرا للمرور