السبت، ٥ يناير ٢٠٠٨

من فضلك وطي التسجيــل


من فضلك وطي التسجيل…
ياد يا كثيف يا شبيه الفيــل…
أنا زهقان... منك طهقان …
كل كلامك دمــه تقيل…

انت فاكرني سفيه يا أخينا ؟؟
ومشغل لك هورن سرينة..
أو عايز منك تنادينا..
وتقول لي يا سعاة البيه ؟؟؟
قصَّر بطَّل يا اسمك ايه
قوموا يا عالم ردوا عليه
أو ادوا له النص جنيه
اسكت خالص أنا مش ناقص ..
توجع راسي بامتى وليه ...

ولا عايزني أقول لك حاضر
بكرة وبعده وأمس وليل
ولا فاكرني هقولك ماشي..
داونلود جاري التحميل..؟؟

أنا مش كدا يا خفيف الظل
ياللي شهير بتقيل الدم
ومشيل للناس الغم
بيقولوا عليك الهلفوت

منتا صحيح تتغاظ وتموت
لما نقول لك توت توت توت
لما ننادي بحس وصوت
ونوقع لك ورق التوت
اللي يغطي عوار الصوت
منتا أساساً صوتك عالي..
فاكر نفسك واحد غالي
حتة بدلة وحتة جزمة..
وعلى مساكين الناس تتعالي
وكأنك من برا الكون

حقا يا ناس مش ده مجنون؟؟
لما يكون بارد مفـتون..
لما يكون ف البيت مكنون
لما يخانق و بيتشاكس لما يناطح صخر الحيطة
جوا الحارة وعامل زيطة...
برا الشارع بيكون شارع..وبيمشي بجوار الحيطة
اسمه أساساً عبده جبان..
مجرم حاقد وغد كمان
مخه يا ناس جدا تعبان
لو شفته هتقول دا شيطان..
لابس لبس البني آدمين

بيقول دا انا طيب مسكين
بس علامته عقله صغير
وصحابه مش محترمين

هما صحيح حبة تماحيك..بيقول ومعاهم تشكيك...
بس احنا من غير تعكيك..
من غير سب من غير شتم من غير ما نهرتل ونلوص
وف أعراض الناس لا ندوس
وف نياتهم مش بنغوص
ليجروا ورانا بغاب الخوص
يفتكرونا ضمن اياهم

ضمن العالم مش كفياهم
إن يكونوا عبيد لشيطان
أو لمنافق فأر جبان
بل بيثوروا زي الثورو ويقولوا احنا الشجعان
حلمك بس عليا يا عم ..

اسكت احسن لك واتلم
احسن اجي لك اخرم عينك
او تلاقيني كابوس بيجي لك
كل نهارك على طول ليلك
انت فاكرنا م الناس دول

اللي يخافوا م البهلول
ماشي بعضلاته مفتول
فاكر نفسه صاحب القول
امشي عدل ..امشي معدول...
احنا يا خويا مسلمين...

مش بنخاف م المجرمين...
نعمل لك م البحر طحين..
ونوديك تيجي عطشان...

نفطر بيك وباللي معاك
أصل شهيتي زي الراك
تاخد هارد كمان ف الباك
حبة ملح وحبة ميه ومعاهم بسكوتة تاك
واحدة بيضة وحتة جبنة ولا تقول لي فلان غداك
اصل لساني طويل فتاك
مش بالوندوز ولا بالبونتو دا نظام تشغيله الماك
انجز م الآخر يا خفيف ..
عايز ايه من كل عفيف؟؟؟
كل شريفة كل عفيفة تخلع برقعها وتقول
للحرية...العاطفية...كله شباب وبنات محلول؟؟؟
احنا بناتنا محترمين...
جوا أصول الدين ثابتين...
على حب الدين متربيين
هو نبينا ليهم لينا...كلنا ليه دايما تابعين
كل عفية كل قوية تبطح لك راسك وتكون
زي صفية القرشية..لما قتلت المفتون..

أنا قايم ماشي يا جميل
اقعد رتب التحليل..
كم جزراية وكام خيارية اعمل لك أحسن تخليل
أنا بهدوئي.أدبي وذوقي
آخر مرة ها قول لك فيها
من فضلك وطي التسجيـــــل
---------------------------------------
المقال القادمة إن شاء الله-تعالى-

(المغالاة في التبديع..نحو ترشيد استخدامه)

هناك ٣٣ تعليقًا:

Unknown يقول...

بسم الله ماشاء الله جامد جدا والله يادكتور واضح ان عند حضرتك مواهب كتير ربنا يبارك فيك
وعلي فكره عاصفة النار 3 نزلت الحقها بقي قبل ماتبرد
وجزاكم الله خير
المره دي بقي اول تعليق وحقي يبقي محفوظ
علي فكره في تعليق في الموضوع اللي قبل اللي فات حضرتك مرديتش عليه فيه
الايميل elga3fary86@yahoo.com
ارجوا التواصل مع حضرتك

محمد عبد الغفار يقول...

جديده دى

بس مش هيوطيه بردو

عصفور المدينة يقول...

المغالاة في الإبداع
:)

ammola يقول...

(:
(:
(:
(:
أكرمك الله

بنت الصالحين يقول...

ماشاء الله
مواهب كمان غير الدكترة
ربنا يثبت حضرتك ويكرمك

مشروع انسان يقول...

ايه ده كله
ربنا يكرمك
لا قصيدة محكمة اوى
ولا شعر حر
المهم شعر جميل
ومتظبط تمام
هيوطى التسجيل اكيد
وممكن يبيعه
بعد ما يسمع الشعر ده

مـحـمـد مـفـيـد يقول...

جامد يا خالد

صاحب المضيفة يقول...

لا كده كتير يا دكتور علينا

وشعر كمان

ومش اي شعر

ده حاجه عمولة

بوركت الأنامل

محمود الدوح يقول...

انا مكدبش عليك يا دكتور واقولك ان انا بفهم فى الشعر جامد لكن على قدى
بدوق المعانى
وبجد طعمها عجبنى جدا
بس انت نسيت السمك وقلت الجزر

المهـ إلي الله ـاجر يقول...

(: (:


بس احب اعرفك انه مش واخد باله ان التسجيل عالي


هو بيحب يسمعه كده (:

رفقة عمر يقول...

جميله قوى ربنا يبارك فى حضرتك

Dr.khaled يقول...

رحت يا عم الجعفري عند عاصفة النار...
وما شاء الله عليها..ملهلبة..وبالشطة والليمون
ابقه سلم لي ع اليعأوبي...
وقول له يبقى يعدي حدانا...
اه فعلا انا لاقيت تعليقك وفيه تعيلق تاني بعديه..بس مش هرد عليه معلش.....
دا الواحد بيرد ع الجديد بالعافية...
عقبال عندك فاضل لي شهر واخلص من التلمذة...
ثم نتجه للزواج المبكر ان شاء الله عقبالك...ودعواتك :)

Dr.khaled يقول...

أنا متأكد يا استاذ محمد انه جدع...وهيوطيه...

على فكرة انا ما اقصدشي شخص بعينه....
انا بوجه الجريدة دي (فاهمني انت طبعا)
لكل واحجد بيقعد يزعق ويعمل هليلة ع الفاضي

Dr.khaled يقول...

باشمهندس محمد...
متشكرين جدا ع الكتاب وربنا يجزيك خير...

:)
استعدي...عشان ان شاء الله تيجي القاهرة يوم 4/2 ...
بس مش للموضوع اللي في بالك...
ده حاجة تانية هابقى اتصل بحضرتك بخصوصها :)

Dr.khaled يقول...

واياك يا استاذة امل

Dr.khaled يقول...

واياكم الاخت عاشقة الفردوس

Dr.khaled يقول...

واياكم الاخت عاشقة الفردوس

Dr.khaled يقول...

حتى لو باعه يا سيدنا الامام

فيه ناس تانيين هيشتروه...
بس ان شاء الله...
هيلاقوا اللي يبور ليهم التجارة بتاعتهم :)
احم احم

الأشباح قادمون

Dr.khaled يقول...

مين يا استاذ محمد اللي جامد
هو ولا انا ؟؟
ولا الاكل اللي في القصيدة ؟؟؟؟

Dr.khaled يقول...

وفيك يا استاذ
يا صاحب المضيفة...
ربنا يتقبل يا أخي...
ويجعل الهجاء ده في سبيله ونثاب عليه

كما قال حسان -رضي الله عنه-
هجوت محمدا فأجبت عنه...وعند الله في ذاك الجزاء

Dr.khaled يقول...

يا اخ محمد الدوح

انت متأكد انك بتتذوق الأكل كويس؟؟؟

انت عايزني اقول في القصيدة بتاعتي...
واحدة بيضة وحتة سمكة؟؟؟
علشان لو واحدة ست بيت شافتني...
تعرف اني مباعرفشي اطبخ...(سمك على بيض)
أوم بأه اترفض...؟؟؟
الله المستعان :)

طبعا انا امزح معك :)

Dr.khaled يقول...

استاذ احمد المهاجر الى الله :)

انا ما اقصدش شخص بعينه...
زي ما قلت فوق..
انا اقصد كل واحد بيزعق ع الفاضي...

ممكن يكون اللي بيزعق ع الفاضي ده...
هي نفسنا الأمارة بالسوء...

لكـــن...!!!!

Dr.khaled يقول...

وفيك يا استاذة رفقةعمر

فرنسا هانم يقول...

ضاكتورنا العزيز
الراجل مش هيوطى التسجيل
الراجل هيبيعه خالص
احسن تتخرم عينه
بس يستاهل اكتر من خرم العين
عموما
جميل جدا يا دكتور
ثم
ثم
ثم
ثم
ثم انا حبيت اقولك ان وانا برد عليك غلطت فى الكتابه بدل ما اكتب ابو شمس كتبت ابو خالد ولم اكتشف هذه الغلطه الا الان فقط والله العظيم
وكان ممكن دلوقتى امسحها
ولكن اردت ان اخبرك انى سوف امسح الرد واكتب لك رد اخر
مع تحيات اختك فرنسا هانم

صانعة الحرية يقول...

السلام عليكم
اولا ما شاء الله رائع يا دكتور
ربنا يجعله فى ميزان حسناتك



ثانيا
احتسب يا استاذنا ما يقوله لك شخص فى الشوت بوكس
واعلم ان الابتلاء على قدر الايمان
وجعله الله فى ميزان حسنات حضرتك

Unknown يقول...

خليك وراه لغاية مايوطيه
ولو ماسمعش الكلام اكسرهوله

(اصل انا شعاري وجادلهم بالتي هي احسن)
:))

Dr.khaled يقول...

ياريت يبيعه يا استاذة فرنسا..
:) وفضلا -وليس أمرا طبعا-لو تستطيعي ازالة صورة الاخت عبلة ..يبقى خير
اصلها لابسه حجاب ع الموضة

Dr.khaled يقول...

واياكم يا استاذة صانعة
ونسأل الله الثبات والحلم

Dr.khaled يقول...

الاستاذة مناجاة

ليس من منهجنا تغيير المنكر بالعنف...
اذا كانت هنالك سبل لتغييره بالكلام...
فالعنف هو أخر شئ..
فهناك محاورات ومناظرات واقامة حجج...ومناقشات ونقد شبهات وابطال تأويلات وكلام كتير اوي اوي...
ثم ان لم نستطع....
فيمكننا ان نغير هذا المنكر باليد -وطبعا مع الاخذ في ذلك اعتبار المصلحة والمفسدة-

اعتقد ايضا انه لا ينبغي ان أستشهد بهذه الآية في باب المزاح...
والله أعلم..
ونسأل الله الثبات على منهج اهل السنة

Unknown يقول...

ربنا يبارك فيك يادكتور وييسر لك الاحوال ومعلش اليعقوبي مطحون في الامتحانات والله واديك شوفت اللي حصله
وان شاء الله تخلص من التلمذه وتبقي ابوبكر الرازي التاني كمان
وجزاكم الله خير

Dr.khaled يقول...

واياك يا الجعفري...

بلغ له سلاماتي
وقول له

نحن أقوام لا تهزنا الرياح العواتي...
فكيف تهزنا حتة ورقة امنتحان مكتوب عليها أجب عن السؤال الآتي...

Unknown يقول...

اكيد انا معاك ان العنف مش مبدأنا
على الرغم ان كلامك اعنف من اليد احيانا
:)
انا لا اقصد التهريج بالآية استغفر الله العظيم من ذلك
انا اقصد نفسي اني بكون قصدي ابدأ بالحسني زي خلق الله مش باعرف بدخل شمال على طول

šσяšαяαα يقول...

السلاااااااام عليكممم

ماشاء الله ايه الابداع دا كله

فكرتنى بواحد كان مشغل اغانى فى المواصلات عالموبايل ومعلى عالااااخر تقولش بيسمع خطاب الرئيس

يعنى مع اختلاف فى نوعية الموضوع بس فكرتنى بيه دلوقت.. اهو دول ناس مش لاقيه حد يقولهم ان الحرية مش معناها الاعتداء على حرية الاخرين وعلى عقيدتهم وكمان لما يكونو هما الصح والناس اللى عاملة فيها مصلحين وهما اللى خاربين البلد اساسا

ماعلينا ربنا يهدى