السبت، ٧ أبريل ٢٠٠٧

يا تذاكر...يا قدامك حاجة من 2




نصيحة مني للطلاب اللي مبيحبوش المذاكرة
شدوا حيلكوا يا شباب الامتحانات
قربت.....

أولاً: بالنسبة
للاخوة
قدامكوا حل من 2
يا تنجح يا تسقط...
لو نجحت خير وبركة... ولو سقطت
قدامك حل من 2 .
.يا اما تصيع
في الشوارع يا اما تقدم
في كلية عسكرية
اذا صعت مفيش مشكلة..كلنا لها....
اما اذا دخلت كلية عسكرية فقدامك حاجة
من 2
يا تدخل الشرطة يا تدخل الجيش..
لو دخلت الشرطة..خير وبركة.....هيبقى
معاك فلوس كتير.....أوي
اما لو دخلت الجيش فقدامكم حل من 2 ..
يا اما يوزعوك احتياطي ..يا اما على
الجبهة
لو وزعوك احتياطي...خير وبركة....
ولو اتوزعت على الجبهة..قدامك حاجة من 2
يا اما ترجع
بالسلامة..يا اما تتضرب بنيران صديكة...هههههه حلوة صديكة دي..قال يعني اليهود
اصدكائنا..
المهم
لو رجعت بالسلامة..يبقى نعمة وفضل...
اما اذا اضربت بنيران صديكــة فقدامك
حاجة من 2
يا اما تخف -ربنا يشفيك يعني-..يا
اما تموت
لو خفيت..صلي ركعتين شكر
ولو متت..قدامك حاجة من 2
يا اما يسيبوك للكلاب تاكلك..يا اما تعفن....
لو الكلاب اكلتك يبقى خير وبركة...
ولو عفنت قدامك طريق من 2
يا اما تتحول لغاز
طبيعي....يا اما تتحول لـ نفط -بترول يعني-
اذا اتحولت لغاز طبيعي...خير وبركة...
واذا اتحولت لنفط (بترول يعني) قدامك
حاجة من 2...
يا اما هيصدروك نفط خام..
يا اما هيكرروك في مصفاة نفط...
اذا صدروك ..خير وبركة....هتتباع
برخص التراب...
واذا كرروك ..قدامك حاجة من2
يا اما تتحول يا حلو
لزيت شل أو إسو..تبع الشركة يعني.. يا اما تتحول لمواد تنظيف...
اذا بقيت زيت شل..أو إسو..برضه تبع
الشركة يعني...يبقى خير وبركة...
اما اذا بقيت مواد تنظيف فقدامك حاجة
من 2
يا اما تبقى صابون...يا اما تبقى ورق
تواليت ...
اذا بقيت صابون...خير وبركة
أما إذا بقيت ورق تواليت فـ
-------------->>>>>>>>>
انتوا عارفين الباقي بقه...
بالله عليكم مش المذاكرة
أحسن؟؟
اتوكلوا على الله ذاكروا
ثانيا: بالنسبة بقى..للأخوات
برضه هنقول بسرعة..علشان انا عارف ان
الكل عايز يزاكر..خصوصا بعد ما عرف مصيره إيه...
بصوا يا اخواتنا..
بعد النتيجة..يا هتسقطي..يا هتنجحي..
نجحتي..خير وبركة... سقطتي برضه خير
وبركه...
الاتنين آخرتهم القعاد في البيت..وبعد
كده
يا تتجوزي..يا
متتجوزيش...
اذا ما اجوزتيش..خير وبركة
اذا اجوزتي..قدامك حل من 2..
يا هتخلفي..يا اما مهتخلفيش..
اذا ما خلفتيش...خير وبركة..
واذا خلفتي..قدامك حل من
2.. يا تعيشي بعد الولادة..يا تموتي...
اذا موتتي...كملي بقه السلسلة من الكام
سطر الي فوق..من أول قول الشاعر (
يا
اما الكلاب تاكلك..يا اما تعفن....)
الى قوله .
.ورق
التواليت
واذا عيشتي..قدامك حاجة من 2
يا تبقي تخينة بعد الولادة...يا تبقي
رفيعة...
اذا بقيتي رفيعة..خير وبركة...
واذا تخنتي...قدامك حاجة من 2...يا تلعبي
في وزن الديك التقيل....يا تخشي على وزن الفيل... (مصطلحات في المصارعة... اللي انا
بكرهها)
اذا لعبتي في وزن الديك التقيل....ميضرش
اما اذا خشيتي على وزن الفيل...قدامك حل
من 2
يا تحاولي تخسي...يا
متحاوليش..
اذامحاولتيش..و كملتي في وزن الفيل الى
مالا نهاية....مش كويس ع الصحة
و إذا حاولتي تخسي قدامك حاجة من 2
يا تعملي شفط دهون...يا تخسي ع الابر
الصينية
اذا عملتي عملية شفط دهون. ممكن خرطوم
الاكسجين يتفلت من بقك ساعة العملية..وتقعدي في المستشفى زي سعاد نصر..وتموتي
اكلينيكيا..وتكملي بقية الكصة..كما ذكرنا سابقا...من اول قول الشاعر......الى
قوله........
يا تعملي ابر صينية وتخفي في موضوع الاكل
وكده
اذا عملتي الابر الصينية وخفيتي في موضوع
الاكل...قدامك حاجة من 2
يا تواظبي على الريجيم وتخسي..يا تفضلي
زي ما انتي...
اذا فضلتي زي مانتي...انتي حرة
اذا خسيتي
قدامك سكة من 2...يا إما جوزك يطلقك..يا
اما يموت.

اذا مات خير وبركة

اذا طلقك قدامك حل من 2...
يا تاخدي العيال..يا تسيبيهم له
اذا سبتيهم..راحة من وجع القلب...
اذا خدتيهم...قدامك حاجة من 2
يا يدي لك نفقة 200 جنيه يا 250
اذا دفع 250...كتر خيره..
اذا دفع 200 ...يبقى معندوش دم....
وقدامك حل من 2
يا تروحي تجيبي هدوم من بورسعيد
وتبيعيها..يا إما تبيعي فجل وجرجير جمب بتاع الجرايد
اذا جبتي هدوم من بورسعيد...مش كويس
..عشان الجمرك...والأرف اللي فيه
واذا بعتي فجل وجرجير..قدامك حاجة من 2...
يا الناس تشتري منك يا محدش يشتري
اذا اشتروا..خير وبركة....ما اشتروش...
يبقى هتضطري تقفي على باب الجامع و
تتسولي وقدامك حاجة من 2

يا اما الشرطة تقبض عليكي .. يا اما تبقي مليونيرة

اذا بقيتي مليونيرة ...يبقى خير
وبركة...كل يوم هنسمعك في التلفزيون..ونشوفك في الراديو وتصدعي لنا دماغنا ...(سيدة
المجتمع...وسيدة مصر وكده يعني) وتيجي في برنامج
هالة شوز...
اذا الشرطة مسكتك..قدامك حاجة من 2..
يا اما يسجنوكي يا يخرجوكي
...اذا خرجوكي...تبقى مشكلة
(لا ليكي أكل
ولا بتاع)
واذا سجنوكي...يبقى العيال هتتشرد...وفي
السجن قدامك حاجة من 2
يا اما تقعدي في السجن مع بتوع المخدرات
..والحريم اللي في وشهم بشلة ...يا اما تقابلي واحدة من الاخوان

اذا قابلتي واحدة من
بتوع البشلة....يبقى حلو عشانك
اما اذا قابلتي واحدة من الاخوان...كلمتك
عن الدين وحفظتك القرآن...وخلتك تقربي من ربنا..يبقى دخلتي لستة
المحظورة...الخطرة جدا جدا على

!!!!!..........أمن مصر
وسبحانك اللهم وبحمدك أشهد ان لا اله الا
انت.استغفرك وأتوب إليك
الاخوة والاخوات...الامر مزحة..ولا اظن
فيه كذبا -ان شاء الله...
لكن اود التنبيه على شئ... التدوينة
دي.....
: فيها فائدتين
الأولى ..لما
تكلمت عن الرجال...كان الغرض..بيان مصير الانسان...فلربما البنزين الذي تضعه في
سيارتك اليوم..كان إنسانا منذ آلاف السنين.وهو كذلك...وأن حياة الإنسان..هي كما قال
المولى..سبحانه وتعالى : (لقد خلقنا الإنسان في كبد)..فنسأل
الله لنا حسن الخاتمة...وادعوا لي بالشهادة في سبيله..وأن يراق دمي في سبيله
-عزوجل-
الثانية
..لما تكلمت عن النساء.. كنت اقصد امورار تحدث في الواقع وتنطبق على كثيرين من
الناس...في مصر..والذين يشار اليهم بالبنان..وهم في الاصل رعاع... وصدق النبي-ص-
حين حكى ان من علامات الساعة
(أن ترى الحفاة العراة
العالة رعاء الشاء يتطاولون في البنيان)
كما عند النسائي ابن ماجة وغيرهما
بسند صحيح.....فنحن نعرف (س) من الناس الذي كان بالأمس طبالا (زي صبي عالمة كده
يعني)...اليوم أصبح مليارديرا..ويتحكم في اقتصاد مصر..والله المستعان
وكما قال النبي-ص-
(سيأتي على الناس سنوات خداعات يصدق فيها الكاذب ويكذب فيها
الصادق ويؤتمن فيها الخائن ويخون فيها الأمين وينطق فيها

الرويبضة
. قيل وما الرويبضة ؟؟
قال: الرجل التافه يتكلم في أمر العامة . ‌ )
كما في صحيح الجامع..وغيره
تجد انسانا....لا يعلم في دين الله
شيئا..ويتحدث عن الميراث وعن تعديل الشريعة..وتجديد الخطاب الديني...وفصل الدين عن
الدولة..وهلم جرا.......
وتجد امراة..متبرجة سافرة داعرة...تفتي
وتقول في دين الله ما لم ينزل به من سلطان
والأمثلة كثيرة....وربنا المستعان
أختم مقالتي بأبيات شعر..للدكتور
يوسف القرضاوي
..-حفظه الله- قال وهو يجادل الخاملين...ويحاج
الخامدين..ويوبخ الهامدين :
قالوا السعادة في السكون..وفي الخمول وفي الخمود .....في العيش بين الأهل لا...عيش المهاجر والطريد
في المشي خلف الركب في...دعة وفي خطو وئيد .........في أن تقول كما يقال..فلا اعتراض ولا ردود
في أن تسير مع القطيع..وأن تقاد ولا تقود ................في أن تصيح لكل والٍ:...عاش عهدُكُم المجيد
قلت: الحياة هي التحرك...لا السكون ولا الهمود ..........وهي الجهاد وهل يجا...هد من تعلق بالقعود؟
وهي التلذذ بالمتاعب...لا التلذذ بالرقود ...................في أن تذود عن الحياض...وأي حر لا يذود؟
هي أن تحس بان كأس...الذل من ماء صديد ...........هي أن تعيش خليفة...في الأرض شأنك أن تسود
وتقول: لا,ونعم,إذا ما...شئت في بصر حديد
ولعل الشيخ يكنى بقوله
(في بصر حديد) عن العلم..اي انك تقول نعم أو لا..
.فقط
..اذا
كان لديك علم يجعل بصرك حديداً..كما يقال...ان فلانا نظرته للاحداث..ثاقبة..والله
أعلم
فاللهم إنا نشكوا إليك ضعف قوتنا وقلة
حيلتنا..وهواننا على الناس
بص يابني انت وهي...
فيه اوضة كده في البيت اسمها اوضة المذاكرة...روح النهاردة ادخلها..هتلاقي عليها عنكبوت...وحمامتين وبيضتين
شيل العنكبوت...وكل البيضتين...وخش ع الكتاب
معلشي طولت عليكم
.....

هناك ٥٥ تعليقًا:

أمــانــى يقول...

اكثر من رائع
اسلوب جميل اوووووى
وفقك الله لما فيه الصلاح يارب امين
ويوفق المسلمين جميعا ياااااااارب

Karim Ali يقول...

لو قريت البوست ده يبقى قدامى حل من إتنين .. يا إما مردش.. يا إما أرد وأشكرك على توصيل النصيحة بالطريقة الجميلة دى

تقبل تحياتى

:)

يا مراكبي يقول...

أنا مش مصدق إن البوست خلص أصلا .. أنا إتفاجئت إنه خلص وقعدت ربع ساعة مش مصدق

هههههههه

بوست حقيقي رائع وهادف في نفس الوقت .. أحييك بشدة عليه .. وأحييك أكتر على إسمك اللي إخترته لنفسك هنا

Dr.khaled يقول...

الاستاذة أماني
شكرا على المرور.وجزاك الله خيرا
وأؤمن على دعاءك...اللهم آمين

Dr.khaled يقول...

أستاذ كريم
كويس انك قريت البوست...وانك علقت عليه
لان لو مكنتش علقت عليه كان قدامك حاجة من 2
يا اما هضايق منك...يا اما هطنش...
ولو طنشت ..يبقى خير وبركة....
ولو اضايقت..يبقى فيه حاجة من 2
يااما استخدم الاسلحة يا اما لا...
لو استخدمت الاسلحة يبقى خير وبركة...
ولو ما استخدمتهاش ...يبقى برضه خير وبركة
ويجعله عامر :)
ت ح ي ا ت ي

عبدالله المصري يقول...

السلام عليكم
أخى خالد اللى مش خالد ,
ادعوك للاطلاع على كتاب ثورة الاخلاص وطريق الخلاص راجيا المولى عز وجل ان يهدينا ويهديك الى سواء السبيل وان يجعلنا اقوى من انتماءاتنا الفكرية والسياسية (أهواءنا) فلا تصدنا عن تمييز الحق واتباعه .
بارك الله فيك والسلام عليكم .
موقع الكتاب :

www.thawrtalekhlas.blogspot.com

Dr.khaled يقول...

الباشمهندس أحمد ثروت..المراكبي...بحاله عندنا؟؟
لو كنا نعرف كنا طلبنا اشيش و2 كومبو و نص كوباية شاي

ان شاء الله الشاي في المدونة بتاعتك المرة الجاية
يارب ترجع مصر بالسلامة......
بس تبقى مش مأروصة
و د م ت م ب ع ا ف ي ة

الديب يقول...

بعدما قريت التدوينة ..قدامك حل من اتنين
يا اما انتقدك ..يا إما اشجعك

لو شجعتك خير وبركة .. ولو انتقدتك يبقى قدامك حل من اتنين

يا اما تتقبله بصدر رحب ..يا إما تقفش عليا
لو تقبلته يبقى خير وبركة .. ولو قفشت يبقى قدامك حل من اتنين

..

..

يا عم انا هاشجعك واريح دماغي من اللادر دياجرام اللي كنت هارسمهولك ده

ربنا يوفقك
!!

بجد جميل جدا .. يسلم ايدك

khaled يقول...

جاممذ مووث
بس موش عارف اقولك ايه
انا موش منهم وقريب هتمسح مدونتى من عندك
ههههههههههههههه
شكرا على مرورك

ibn nasser - ابن ناصر يقول...

هههه بوست رائع والله
تحياتي
وعلي فكره هبقي النائب بتاعك

عصفور المدينة يقول...

الحمد لله إحنا مخلصين مذاكرة من زمان أوي وكل قراءتنا اختيارية يا نقراها يامانقراهاش
لو قريناها خير وبركة ولو ما قرناهاش مش حناكل عيش
اقتبست بانر شم النسيم منك قبل إذنك
وبعدين أدعوك لزيارة مدونتي الجديدة(الفرع الجديد) والتي أسميتها قطاع الأخبار بس هي لسة جديدة خالص

دسوقي يقول...

السلام عليكم

ايه الحلاوة دي يامولانا

قدامك حل من اتنين

ياتكبر الفونت ياتصغر البوست

تحياتي

BinO يقول...

أخيراً البوست خلص
كلام جامد رغم أن ماليش فيه
ربنا يسهل للجميع

daktara يقول...

والله انت زي العسل
يمكن لأنك علي اسمي
هاهاهاهاهاها
د. خالد عزب

Dr.khaled يقول...

أستاذ عبد الله المصري...
حياك الله وجزاك خيرا على مرورك
انا بالفعل تصفحت عناوين الكتاب اول امبارح
لكن لي طلبان
اولهما: هل حضرتك اللي الفت الكتاب؟؟
ثانيا
من فضلك هل يمكنك -وهو طلب وليس أمراً-
ان تقوم بكتابة الكتاب حسب ما صنفته انت في برنامج الورد وضغطه واعطائي رابطه...
حتى لا اكون مشتت الذهن
أو انني لو قمت بحفظ الصفحة فان هذا كافي؟؟
أفتونا مأجورين غير مأزورين

ن ح ي ا ت ي

Dr.khaled يقول...

أستاذنا الكريم صاحلة مفهوم الدولة الدينية موجود عندنا
يا اهلا بيك
ارحب بانتقاداتك البنائة والهدامة ايضا :)
رحمك الله...
وغفر لك
وجزاك خيرا
على التشجيع

Dr.khaled يقول...

أهلا استاذ خالد
على فكرة
انا كمان كنت عايش في المنصورة زمان...بس نقلت من هناك
وكمان اسمك زي اسمي
ولي عتاب عليك....
هارسلهولك ان شاء الله على ايميلك اذا امكن

و د م ت م ب ع ا ف ي ة

Dr.khaled يقول...

ابن ناصر -الملثم ..المقنع-

انا ما اقبلشي انك تكون النائب بتاعي
ودي مش طريقة تكلمني بيها
فيه تسلسل قيادي
الاول تكلم
رئيس مجلس المدينة بتاعك

ثم المحافظ ثم الوزير ثم رئيس الوزارء

ثم تبقى تيجي تطلب مني ابقى افكر
اقبلك
نائب ليا ولا لأ
دي أمانة ورئاسة جمهورية.....
مش عزبة أبويا -الله يرحمه-

تفضل وردة -فلاور يعني-

Dr.khaled يقول...

الاستاذ عصفور المدينة
عدو الاطباء...
وطبيب الاعداء

شرفتنا
بالفعل زرت قطاع الاخبار الخاص بقناتكم المجيدة..أمد الله في عمرها

واقترح عليك اضافة هذا الموضوع الجديد الهام جدا جدا...
في قطاع الاخبار تحت عنوانا
خيبر خيبر يا يهود...جيش محمد بدأ يعود -بلاش عشان خاطري تكتب سوف يعود
وادعو كمان كل الاخوة والاخوات لزيارة الرابط المهم جدا جدا ده

http://www.almesryoon.com/ShowDetails.asp?NewID=32650&Page=1

Dr.khaled يقول...

اهلا وسهلا دسوقي
فينك من مدة
لا جديد في مدونتك؟؟؟
الله المستعان

Dr.khaled يقول...

أستاذ بينو
من حقك زي مبيقولوا-تدلع-
سيادتك حلصت وكمان كنت جايب 98 في الميه
وكده
الله يعينك
اقرأ المعوذتين والاخلاص والرقية الشرعية
علشان الـ (عيــــــــون)
ش ر ف ت ن ا

Dr.khaled يقول...

خالد يا دكترة
ياللي المشرط معورلك صباعك
انت اللي على اسمي

مش انا اللي على اسمك
انا اكمبر منك
حتى تعالى نقيس

يا
د ك ت ر ة

Tamer Nabil Moussa يقول...

هههههههههه

طيب كنت \خلى الموضوع على كم جزىء كدة عشان العيون هههه

فكرة رائعة ومقال جميل

تحياتى

Dr.khaled يقول...

الشيخ الدكتور الاستاذ المهندس/تامر نبيل
اهلا وسهلا بك
لكن يا ترى ايه قصد سيادتك بتقسيمه على مراحل علشان العيون ؟؟ :)

غير معرف يقول...

first time to see this blog and sorry but i have to comment :

1-Enlarge the font i am going to go blind cause of the small size of ur font


2-Stop advising people start to just say stick to ur point of view

3- The content is great but please seek help in your blog design and organize it

4- You are a great religion writer so please dont stop


regards

// MahMouD & MosTafa // يقول...

ايه الحلاوة دى

بسم الله ماشاء الله

بجد بجد والله موضوع راااااااااااااااااائع


بس إما أقراه
هيكون أدامى حل من 2 إنى أضحك أو أعيط
لو ضحكت يكون خير وبركة

أما لو عيطت
هيكون أدامى حل من 2
إنى أطأ من العياط أو أموت

لو مت يكون خير وبركة
أما لو طئيت من العياط هيكون أدامى حل من 2

إما أنى

يا عم أنا أكبر دماغى وما أدخلشى على المدونة دى تانى وخلاص

بجد تحياتى

MahMouD
صاحب مدونة هو فى ايه ؟؟
اللى ما تجيش حاجة طبعا جنب بتاعة حضرتك
بس احنا ناس غلابة

httpwww.wnated.blogspot.com

khaled يقول...

مافيناش من زعل ايميلى
data_101@hotmai.com

عالمى ازرق يقول...

هههههههههه
ماشاء الله كتابتك مميزه
مدونتك تستحق المتابعه
تقبل تحياتى

Dr.khaled يقول...

Sister, Memo
u r welcomed , but i think that the fomt is good enough in my writing , except in one topic only :)..
thx 4 ur advice& i do not think that i will study :) as i like 2 advise others only , but not myself :(
can u explain plz, wt is meant be organizing my blog..do u mean that it contains so many banners or wt??
lastly, thank u so much &
Gazak Allah okhyran

Dr.khaled يقول...

أستاذ/ هو فيه ايه

أهلا وسهلا مرحبا
نورك أطع الكهربا
شرفتنا..تن تن تن
نورتنا..تن تن تن

جزاك الله خيرا على المرور

بس اوعى تقع من البانر اللي في المدونة على التاسك بار وتبقى مجرد أيكونة
و د م ت م ب ع ا ف ي ة

Dr.khaled يقول...

أستاذ /خالد
اللى اسمك على اسمي..

خلاص...السبب اللي كنت هراسلك عشانه زال
الحمد لله
:)
اتفضل ثلاث وردات ملونات
فلاورز يعني

Dr.khaled يقول...

ذات العالم الازرق
شكرا على المرور
وجزاك الله خيرا

ودمت بعافية

Islamist Bloke يقول...

يا جامد يا جامد يا جامد يا جاااااااااااااااااااااااااامد

اية الحلاوة دي يا ضاكتور....ضحكتنا وأبكيتنا والله

بالنسبة للضحك...كان فى البداية مع اول سطرين...بالنسبة للبكاء..فاستمر مع باقى البوست

بس تصدق

انا حاسس انى دوخت من البوست ده

تسلم الايد اللى كتبت

وربنا ما يصيبك بنيران صديقة

سلام يا ضاكتور

العــــراق يقول...

السلام عليكم اخي خالد
بوست جميل بارك الله فيك
واتمنى انك وجدت الفلم وممنون جدا لزيارتك
السلام عليكم

Memo يقول...

Gazana We Aiakom :
As for the design I recommend
1- the side banner contains photos up and down and every where with different sizes and colors and with no organizing at all I don’t know where is the paragraphs and where is logos ay 7aga 3la ay 7aga b2y 7agm b2y klam we fy ay heta
2-The Green font is very light you could choose darker color for your green blog in order to ease people distinguishes between the back ground and the color of ur writings
3- the posts color is light grey and green as if you want people not to read what u r writing Never mention the middle unorganized paragraphs and the different sizes logos in the middle of no where
4- you don’t need to study kefia el enta fih
Thank you for accepting my advices with that attitude but I only want what is best for your great writings and ideas as I heard you are running for president in your blog
Best of luck

عصفور المدينة يقول...

أخي الحبيب ضكتور خالد
أهديك هذه التدوينة
http://ctybrd.blogspot.com/2007/04/blog-post_09.html

محمد يقول...

السلام عليكم

جميل جدا ..

أسلوب وهدف .. أكثر من رائعين

جزاك الله خيرا

Dr.khaled يقول...

هههههههههه
الصياد الجامد اوي جدا خالص اللي مبيجبشي ولا سمكة موجود عندنا؟؟
يللا خير ان شاء الله
بس المرة الجاية ان شاء الله تجيب غداك معاك

شرفتنا يا صديكي
صحيح
هتحط الفيديو الكليب الجديد بتاعك امته؟؟
علشان نحطه مع الاولاني
وال2 نعملهم لك البوم وننزله على روتانه سينمه
:)

Dr.khaled يقول...

أخي العراق
بارك الله فيه
وجدت الفيديو
اعتقد انه يمثل فيلما صغيرا
على كل هو طيب
وان كنا لا نتقف في تكفير الحكومات باطلاق التكفير هكذا..بلا تفصيل في المسألة
لكن على كل
نسأل المولى -سبحانه- أن تتنهى الفتنة التي نشأت الان بين أهل السنة في العراق
ونقول
حسبنا الله ونعم الوكيل
نسأله -سبحانه- أن ينتقم من اليهود والصليبيين واعوانهم من المنافقين

أخي الكريم
من أروع ما استمعت اليه في نهاية هذا المقطع هو قول المنشد
إن نسينا أو جهلنا سددونا
نقول: دعوا الحكومات وشأنها...لا تطلقوا عليها التكفير
لانهم الان لن يضروكم شيئا...ولن تجدوا كثيرا من الناس يساندونكم
واعتقد انه لا فائدة من تكفيرهم
ما دام ان هذا الامر لن يغير شيئا
نسأل الله السلامة والعافية
وأن ينصر اخواننا المجاهدين
وتقبل تحياتي أخي الفاضل

Dr.khaled يقول...

الأستاذة/ميمو
قمت ببعض التعديلات
اليوم
أظن حضرتك لاحظتيها
يا ترى هي كويسة ولا فيه أشياء محتاجة اعادة تعديل؟؟

جزاك الله خيرا على النصيحة
ورحم الله رجلا..-أو امرأة..أهدى /ت إلي عيوبي

Dr.khaled يقول...

أستاذ عصفور
في الطريق الى مدونتك
باذن الله-تعالى

Dr.khaled يقول...

أستاذ وضاح

سلمت يمناك
وقويت قدماك
ونمت عضلات ساعداك
وأمات الله عِداك

معلشي المضاف اليه عندي مرفوع النهردة
علشان القافية

ل ا ت ن س ى ذ ك ر الله

Unknown يقول...

مقال أكثر من رائع :)

Memo يقول...

Bravo 3likkkkkkkkk
dih msh 3iob dih just notes in order to increase ur blog value

خمسة فضفضة يقول...

السلام عليكم ورحمة الله وبركاته

جميل اوي البوست ده
بس طويييييل اوووووووي
وزي زيهم مش مصدقه انه خلص خلاص


الله يكون في عون كل الناس اللي نتذاكر

daktara يقول...

ماشي يا عم انت اكبر او انا اكبر مش هاختلف معاك من اولها كده
تحياتي
د. خالد عزب

Dr.khaled يقول...

دكتورة فضفة
شرفتينا

Dr.khaled يقول...

دكتور خلود
نورت يا بو صباع متعور

šσяšαяαα يقول...

بقى دا كله حاجه من اتنين بسسسسسسسس
ياشيخ حرااااااام عليييييييييك
قول حاجه وألفين..مش حاجه من اتنين
بس انا الحمدلله اترحمت من الحاجات دى كلها لانى بلغت سن التقاعد من الكوليدج ولله الحمد.
ومفيش احسن مالبيت ومالملوخيه بالانارب(مع انى مابحبهاش:)

شكرا على مرورك الكريم
تحيااااتى

Dr.khaled يقول...

اهلا وسهلا استاذة صرصارة

طب مش تدعي للخوة المبتلين بالمذاكرة
وتقولي الحمد لله الذي عافانا مما ابتلاكم به

مبروك على الخلاص من سجن الكلية
وغفر الله لك

khaled يقول...

الله الله
عرفت اقرا ده تانى
ربنا يوفقك
و اؤمن على دعائك و ادعية اخواننا
اللهم امين
امين امين
و لا تنسانى من صالح الدعاء

Dr.khaled يقول...

أستاذ/خالد

الحمد لله انك قرأت تاني
يارب تكون استفدت
ولو كنت من اهل البلاء...تذاكر
ولو كنت خلصت
يبقه مبروك

Unknown يقول...

جزاك الله خيرا على تلك المدونة الرائعة ونصر الله الاسلام

Unknown يقول...

انا مؤمن على صاحب مدونة our islam اشكرك على مدونتك الجميلة واسلوبك الرائع مدونتى هى ourislam@maktoobblog.com

Dr.khaled يقول...

اهلا وسهلا بيك اخي مؤمن
وجزاك الله خيرا