السبت، ٥ مايو ٢٠٠٧

أخباركوا إيه في اللغة يا مدونين؟؟




سلام عليكم

أنا خالد فاكريني؟؟

بتاع قصة احمد وسماح

معلش انا مش هكتب الجزء التاني لاني متوقع ان المدونين هيعيطوا

وأنا ميخلصنيش كده

قلت نشوف كده حبايبنا المدونين واخواتنا المدونات

إيه أخبارهم في اللــوغــةُ العــرابيــةَ

لذلك قلنا خدوا يا اخواننا أعربوا الجملة دي


( أكل الطالبُ حِــذاءَ شَيخِـــهِ )

وبالتشكيل أهي كمان-يعني بالضبط بالشكل- وأي خــدمــة

عايزين نشوف المهارات

بس بأمانة اللي يقرأها وميعرفهاش..يكتب ...:)

محبكم في الله/خـــالـــد

هناك ٨٠ تعليقًا:

وشوشات يقول...

طيب.. انا بقالي ييجي 15 سنة ما أعربتش جملة عربي واحدة يعني من أيام ثانوي.. انما هحاول، مع اني عارفة اني هاعك.
أكل: فعل ماضي
الطالب: فاعل مرفوع بالضمة
حذاء: مفعول به منصوب بالفتحة
شيخه: مضاف إليه مجرور بالكسرة، و الهاء فيها حاجة بس مش متأكدة هي ايه.. في محل حاجة.. مش عارفة الصراحة.

بس على فكرة دي فرصة كويسة ان الواحد يستعيد حاجات كادت ان تنمحي من الذاكرة تماما.

صاحب البوابــة يقول...

أحببت فقط أن اسلم عليك يا أخي الغالي عندما مررت بمدونتك الجميلة

تحياتي عزيزي

عصفور المدينة يقول...

طب ما هو لو واحد عربها الباقيين حيغشه
وبعدين ممكن نعترض على المحتوى ده انت فتجت موضوع فظيع
شفت المؤتمر بتاع القضاة كلامهم جميل جدا وحماسهم وعاطفتهم جميلة وإصرارهم ووعيهم بس زعلني موضوع اللغة

عصفور المدينة يقول...

نسيت أقولك
اعرب قول الشاعر د خالد:
يا مدونين
:)

إيمان الحسيني يقول...

أكل : فعل ماضي مبني على الفتح

الطالب : فاعل مرفوع وعلامة الرفع الضمة الظاهرة

حذاء : مفعول به منصوب وعلامة النصب الفتحة الظاهرة وهو مضاف

شيخه :
شيخ : مضاف إليه مجرور وعلامة الجر الكسرة الظاهرة وهو مضاف

الهاء : ضمير متصل في محل جر مضاف إليه

والله المستعان

Dr.khaled يقول...

أهلا وسهلا استاذة/علا

معلشي بقه الاجابة غلط
نشوف طالب تاني :)

Dr.khaled يقول...

أخونا الاستاذ/صاحب البوابة
اهلا وسهلا بمرورك يا استاذ

Dr.khaled يقول...

ههههههه
بصراحة يا باشمهندس
والله والله
وانا بكتب التدوينة دي كنت هاقول انك متجاوبشي
لاني عارف مقدما

والحمد لله انك كشفت الخطأ اللي في العنوان
بس فيه غلطة تانية املائية في سياق الموضوع زعلتني اوي لما مجبتهاش :(

طبعا طبعا
انا باستاذنك
اني احذف تعليقك اللي اشرت فيه لحاجة في الاعراب
لانك كده هتكشفنا:)
معلشي بعد اذنك وبدون زعل انا همسحها
:)

Dr.khaled يقول...

جزاك الله خيرا يا استاذة/طعمة

وحاولي معنا مرة أخرى :)

مسلم يقول...

الإعراب زي ما طعمه قالت

أنا مش عايز أعيد كتابته

ammola يقول...
أزال أحد مشرفي المدونة هذا التعليق.
أمــانــى يقول...

الســـــــــلام عليكم
على فكرة انا بليدة فى العربى كمان يعنى الاساس عندى ضايع لا عربى ولا حسـاب ممكن حضرتك تبدأ فى دروس اللغة العربية واحنا متابعين يا دكتور
ومتخافش اللى هيحضر لازم يدفع
:D

عصفور المدينة يقول...

ضاكتور انت فين عشان تحذف إجابة أمولا زي ما حذفت إجابتي انا محتفظ بالجايزة

Dr.khaled يقول...

طبعا يا باشمهندس مسلم
الاجابة مش زي ما قالت الاخت طعمة :)

لان الحذاء مش هيتاكل

وان شاء الله في الردود التالية هتبان الاجابة

Dr.khaled يقول...

استاذة/امولة
طبعا اجابتك صحيحة ميه بالميه :)
بس معلش انا حذفتها
مش لحاجة :)
ابدا والله
لكن بس التدوينة دي عايزين نشوف المهارات
وطبعا انا مسحت ردك بعد اذنك
وطبعا مش ناسيين ان اجابتك صحيحة :) ما شاء الله

واحييك عليها
وباقول تاني اهه
انا ممحستش التعليق لشئ
الا اننا عايزين نشوف الابداعات في اللغة
حاجة تكسف :)
متزعلوش مني
اخوكم /خالد

Dr.khaled يقول...

ماشي يا استاذة/اماني

لو اني مش شاطر في اللغة
لكن بارفع طلبك للقيادة العليا
اخونا الاستاذ عصفور
يتولى الامر ده بدالي :)

Dr.khaled يقول...

طبعا طبعا يا باشمهندس

الجايزة ليك
وهي عبارة عن عربية جيب شيروكي فور باي فور موديل 2007 .... ورق :)

المهم انا حذفت اجابة الاخت امولة...ولو انها كانت مفصلة وتمام...يعني نصيبها اكبر في الجايزة :)

عموما
انا مستغرب ازاي انت لغاية الوقتي ما اكتشفتش الغلطات الاملائية في البوست :(

ammola يقول...

بما انكو صحاب من زمان ياللا زى بعضه انا راضيه بالزماره

عصفور المدينة يقول...

يا دكتور أنا يعني عشان مارضيتش افسر عشان مااحرقهاش؟ كدة؟
مش عارف ألاقي إيه اللي صح في البوست بخلاف أكل الواد جزمة الشيخ

بس لقيتها
مأروصين
والصواب
مقروصين
:)

Just a Reader يقول...
أزال أحد مشرفي المدونة هذا التعليق.
Dr.khaled يقول...

طبعا اكمالا
لمسلسل الحذف المتواصل
لاصحاب الاجابات الصحيحة
هنقوم بحذف اجابة الاستاذ القارئ
just reader
علشان نشوف بقية المدونين
وان شاء الله نصيبك محفوظ..انا عاين لك ورك البطة يا استاذ/القارئ :)

khaled يقول...

مش هاجاوب علشان ما باحبش البط و علشان ما اتحذفش
مش انا يا مصطفى
:)

kaed يقول...

زميل المهنة العزيز خالد

وخلى بالك من زميل المهنة دى أوى ها و مش عايزين فضايح
انا علاقتى بالنحو زى علاقتك بعلم الأولاثولوجى
ودى بقى يا حلو حسيبك تدور عليها
و أهو أما تجاوب إنت حبقى أجاوب أنا
و اللة و حتى لو جاوبت أخوك برضة مش حيعرف يجاوب علشان العيب مش فبا لأ العيب فى أبو الأسود الدؤلى

دعاء عادل يقول...

اكل :فعل ماضى

الطالب: اصلا احنا مالنا بيه دا واحد مجنون كل حذاء شيخه وهو ما عملوش حاجه امال لو اتكلمنا عليه وجبنا سيرته كمان هايعمل فينا ايه ياعم

حذاء: برضه مش هاينفع اقولك اعرابه ايه لانه لا محل له من الاعراب ومش هاسمح ليك تقولى غلط لانى واثقه من كده
تقدر تقولى اعرب ازاى حاجه مش موجوده مش انت قلت ان الطالب اكله بالتالى يبقى الحذاء مش موجود وبالتالى برضه يبقى لا محل له من الاعراب

شيخه: ده يا عينى مفعول به مسكين مظلوم راح يدى درس للطلبه راح الواد المجنون واكل حذائه وهو دلوقتى مش عارف يروح ازاى
ايه يا جماعه العبث اللى بتعملوه ده قاعدين تعربوا فى الجمله وسايبين الشيخ محتاس كده حد يروح يساعده ولا ياخدله حذاء جديد يعرف يروح بيه
مش كده ولا ايه يا دكتور خالد
:)

khaled يقول...

انا ماليش فى النحو
بس على العموم اكل الطالب حذاء شيخه
اى خدمه

حازم..بس مش دايما بكون مع نفسي حازم...بس الاكيد ان ضميري هو اللي دايما معايا حازم يقول...

( أكل الطالبُ حِــذاءَ شَيخِـــهِ )

أكل : فعل ماضي منصوب بالفتحه دليل علي الطفاسة
الطالب : ده الفاعل الطفس المرفوع بالضمه
حذاء : ده المفعول به المنصوب بالفتحه عشان اتاكل خلاص
شيخه : ده المضاف اليه المجرور علي عربيه عشان جزمته اتاكلت
الهه : دي بقي ضمير حاجه في محل حاجه غيرها

لو الاجابه غلط ابقي سامحني لاني قلتلك قبل كده اني معايا ملحق عربي

ومادام انت بتختبرنا بقي قولي ايه معني الجمله دي دون الاستعانه باصدقاء
" تقوقز القوقاز متقوقزا "
يللا شد حيلك وحلها بقي
ووريني اخبارك انت ايه في اللغه

أحمد يقول...
أزال أحد مشرفي المدونة هذا التعليق.
Dr.khaled يقول...

يا باشمهندس
قول انك مش عايز تجاوب عشان خايف
مش عشان بطة ولا بتاع

ثانيا
كويس انك عرفت ان المجتهد في البوست ده مصيره الحذف

فالطيب احسن :)

Dr.khaled يقول...

ايه يا دكترة
انا بجد اول مرة اسمع عن العلم ده
اي نعم كل حاجة تقريبا بناخدها في اخرها اولوجي
بس انت هل كنت تقصد
الأولاد ثولوجي؟؟
يعين الاولاد والباثولوجي ؟؟ ودمجت الكلمتين في بعض؟؟
:)
طبعا اكيد انا بألف عشان معرفشي

العلم ميه...ونور :)

Dr.khaled يقول...

اختنا الاستاذة/دعاء
طبعا لان اجابةتك خطأ
فهنفضل سايبينها
عشان الناس تتفرج ع الابداعات في اللغة :)

بس كويس ان حضرتك حسيتي بالشيخ

Dr.khaled يقول...

اميز حاجة فيك يا خلود
انك بتجيب م الاخر
:)

Dr.khaled يقول...

حازم
انت متأكد انك كان معاك ملحق واحد بس في العربي؟؟ :)
وهههههه
من حفر حفرة لاخيه وقع فيها
انا بصراحة يعني ما اعرفشي معنى
تقوقز القوقاز متقوقزا
لاني مش بحب اخرج برة الشرق الاوسط :)

Dr.khaled يقول...

أحمد إجابتك صحيحة
فتتحذف
وهو ده القانون في البوست المرة دي :)

المتميزون يحذفون

وطبعا احبابنا اللي زي حالاتنا
هنسيبهم :)
بس يارب محدش ييجي في يوم ويخلص ده مني

عصفور المدينة يقول...

العدد حتى الآن 13 أربعة منهم جاوبوا صح

abdo يقول...

أولا السلام عليكم
هو أنا تقريبا معربتش أى جملة من حوالى 6 سنين بس أنا كنت عايز أسال هو كلمة حذاء دى المقصود بيها اسم التلميذ ولا الحذاء الخاص بشيخه عشان أعرف أفكر

عصفور المدينة يقول...

طرقت الباب حتى كل متني ولما كل متني كلمتني
فقالت لي يا إسماعيل صبرا فقلت لها يا أسما عيل صبري

Ahmed يقول...

مشكلة للاسف انا مليش في الاعراب من ايام المدرسة
لكن انا موافق على اجابة واحد من الاربعة الصح
وكده يبقى انا الخامس
مش كده

محمد عبد الغفار يقول...

فكرتنى بالذى مضى انا كنت بحب النحو اوى ، كان مدرس للغه العربيه فى ثانيه ثانوى أ/محمد خضير ربنا يكرمه ويمسيه بالخير يكتب قطعه كامله على السبوره ويحط خط تحت كلمتين ثلاثه ويقول
أعرب ما ليس تحته خط لأن اللى تحته خط مدرستوش لسه والحمد لله ربنا كان بيوفق

احنا بنتكلم فى العام الدراسى 88/89

وكنت ناوى اخش واعرب فعلاً بس طعمة ربنا يكرمها مسبتش حاجه لحد ، واعرابها صحيح

abdo يقول...

أنا توصلت للحل بمساعدة من صديقى عصفور المدينة
ومش هقول علشان محدش يعرف

الطائر الحزين يقول...
أزال أحد مشرفي المدونة هذا التعليق.
Dr.khaled يقول...

يا باشمهندس
اصبر وما صبرك الا بالله عايزين العدد يزيد
:)
لما نشوف اللغة الجديدة هتبقه عاملة ازاي :)

Dr.khaled يقول...

استاذ/عبده

:) هتعرف لاحقا ان شاء الله
والحمد لله ان الاستاذ/عصفور قالك عليها
لكن اللي خلاني ابتسم في ردك هو انك قلت (انا اتوصلت للحل ) :)

Dr.khaled يقول...

استاذ احمد الحسيني

كيف احوالك يا اخي

ما شاء الله
اجابتك دبلوماسية جدا
اذا كان حالك هكذا في معظم الزنقات
فانت تجيد الخروج من المآزق :)

Dr.khaled يقول...

يا استاذ محمد
انت كنت بتحب النحو
وهو كمان كان بيحبك

وغفر الله لاستاذك/محمد خضير

بس ما شاء الله اعراب الاستاذة/طعمة غير صحيح :)

وده من حسن حظك
لان لو كانت اجابتك صحيحة كانت هتتحذف :)

Dr.khaled يقول...

استاذ الطائر الحزين

يحكم عليك بحذف تعليقك ...نظرا لصحة اجابتك
وعجبتني اوي كلمتك (المعنى مهم في ....)

لان بدونه الجملة مش هتتحل

اخواني ...تفضلوا بزيارة مدونة اخونا الطائر الحزينة
وهي مدونة طيبة وانا قرأت موضوعاتها
وفقنا الله واياه لما يحبه ويرضاه

http://sadbrd.blogspot.com

abdo يقول...
أزال أحد مشرفي المدونة هذا التعليق.
عصفور المدينة يقول...

يا دكتور انا عمال اجيب زباين اهو الطائر الحزين ده زبوني أي نعم هو اللي حلها بس انا اللي جايبه يعني اقسم معاه
وبعدين انا حطيت بيتين باغشش بيهم الناس

abdo يقول...

اه نسيت أقولك متنساش تمسحه علشان الناس تفكر

Dr.khaled يقول...

ماشي يا باشمهندس عبده

يا اخي
من غير ما تقول

تعليقك هيتحول لقسم الامانات فورا :)

Dr.khaled يقول...

تشكر يا باشمهندس....
طبعا انا مش ناسيك في السمسرة :)

بس البيتين بتوع حضرتك ممكن يكونوا صعبين شوية على بعض الاخوة

باقترح انك تكتب موضوع في مدونتك عن غرائب اللغة العربية...كل مدون يكتب اغرب الكلمات اللي قابلته في اللغة العربية -طبعا الفصحي-
لان العامية كلها غريبة
طبعا ده بعد اذن حضرتك يعني

الله يرحم الاستاذ عبده سلامة..مدرس التوحيد في المرحلة الثانوية
كان اول واحد اسمع منه البيت اليل انت قلته
يللا الله يجزيك خير

ana ga3an يقول...

دكتور خالد
لا افقة في النحو شيء بل ان بيني وبينة عداوة وعقد مستفحلة ضاربة في القدم

كل اللي اقدر اقولة
.
.
.
.
.
بييب بييب الاهلي حديد

Unknown يقول...
أزال أحد مشرفي المدونة هذا التعليق.
Unknown يقول...

لو انا صح امسح !!

محمد يقول...
أزال أحد مشرفي المدونة هذا التعليق.
ammola يقول...

يا دكتوووور العربيه كده اتزحمت اوى

انا حادور واطلع..وما تنساش انى معايا الزماره

Dr.khaled يقول...

ازيك يا سلم

انا زمان كنت زملكاوي :)
بس الحمد لله ربنا تاب علينا من التشجيع والكورة كلها
دا النحو جميل جدا يا اخي

مدرسة البصريين ومدرسة الكوفيين
واييييييييييه
ايام

Dr.khaled يقول...

طبعا من غير توصية يا استاذ /احمد
هنحول تعليقك للامانات والله المستعان

Dr.khaled يقول...

وضاح
طبعا انته اتحرجت تقول انك مش عارف
لكن على كل
خير ان شاء الله

وفقك الله :)

Dr.khaled يقول...

استاذة/امولة
هانت ان شاء الله

عايزين بس نشوف ابداعات المدونين
:)
واهي فرصة للتعرف على المواهب الجديدة

ammola يقول...

دكتور..لو قلت لك الغلطه الاملائيه التانيه ممكن تدينى ورك البطه التانى؟
بيتهيالى-والله يخليك ماتكسفنيش- هى كلمه ماروصين وصحتها ماروصون

انا من اهوى ومن اهوى انا يقول...

خلود ولو انى عارف انى اجابتى غلط بس حاسس ان الجمله دى فيها شىء مش مظبوط
وخصوصا كلمه شيخه مش المفروض تكون اخرها ضمه مش بالكسرة؟ مش عارف عندى احساس كدة .

وربنا يستر :(

نسرين - أمة الله يقول...

السلام عليكم
بص ديه بقى تأليف نحو
انا الاول اعتبرتها جمله فعليه واعربتها زى طعمه وبعدين حسيت انها ممكن تكون جمله اسميه لو اعتبرت ان اكل اسم مش فعل
تبقى اكل مبتدء اول
الطالب مبتدء ثانى
حذاء شيخه خبر شبه جمله والمبتدءالثانى وخبره فى محل رفع خبر المبتدء الاول الاول
عارفه غلط
وفى الاخر بقالى اكتر من اربع ساعت بدور على معنى حذاء شيخه يمكن تغير معنى الجمله
او ان يكون اكل بمعنى اتعب
المهم بقى خلاص انا مش عارفه
وربنا يسماحك تعبت مخى

نسرين - أمة الله يقول...

لا طبعا ايه العك ده
اكل الطالب حذاء شيخه
يعنى اكل الطالب بجانب شيخه
تبقى برضه جمله فعليه
اكل فعل ماضى
الطالب فاعل
حذاء حال والله اعلم
حذاء مضاف وشيخ مضاف ايه
وشيخ مضاف والهاء مضاف اليه
متنكرش ان ده نحو جديد خالص ومحصلش قبل كده
ومن الاخر كده جمله الحال فى محل نصب مفعول به
هههههه
غلط كبير انا عارفه

عصفور المدينة يقول...

الدكتور شكله نام

Dr.khaled يقول...

استاذة /امل

أحييك جدا على انتباهك

ما شاء الله اللهم لا حسد

كلامك صحيح لانه مفيش عامل تسبب في جرها
بل انها تكون صفة مرفوعة للفاعل اللي هو (واحد او اتنين او تلاتة او كده)...والفعل مفهوم من السياق وهو علق
واصل الجملة تبقى (علق تسعة مأروصون مثلا يعني)
والحمد لله على كل حال

Dr.khaled يقول...

حرام عليك يا استاذ /محمد
والله والله بجد كنت هموت بسبب تعليقك :(
اول ما قرأت الضمة
ضحكت جامد وكنت في الوقت ده باكل فلفلة حرة جدا...قامت رايحة من الجهاز الهضمي ع التنفسي وعينك ما تشوف الا النور

لكن الحمد لله
والله يا اخي الواحد قعد يحمد ربنا على النعمة دي
سبحان الله
فعلا وكان فضل الله عليك عظيما
مجرد قطعة طعام صغيرة تمشي في سكة غير سكتها
الدنيا تتقلب
والواحد يقعد يكح ووشه يحمر وينهج جامد
سبحان الله العظيم
لو الواحد دقق
هيلاقي الجسم لمجرد انه شاف لقمة ماشية في سكة غلط قلب الدنيا ومقعدهاش الا لما اللقمة رجعت لسكتها الطبيعية
انما احنا
ماشيين من سنين في سكة بعيد عن ربنا
ولا انتفضنا ولا اتهزينا ولا قلبنا الدنيا
والله يا اخي
صدق الله -عزوجل- لما أخبرنا بلغة الاستفهام الانكاري
(وفي أنفسكم أفلا تبصرون)؟؟
جزاك الله خيرا على تعليقك الذي فتح عيني على امور
والحمد لله على اللقمة التي سارت في طريق خطأ
فجعلت فكرة جديدة تدور في الذهن
والحمد لله على كل حال

Dr.khaled يقول...

طبعا يا استاذة/نسرين
ده مش نحو جديد
دي لغة جديدة باكملها :)
ايه اللي دخل الحال والجملة الاسمية والفعليه
الموضوع سهل جدا

Dr.khaled يقول...

لا الحمد لله منمتش
يا باشمهندس
خرجت بس احضر درس
والله المستعان
طبعا احسن حد يفكر اني شيخ ولا طالب علم
الدرس ده درس جراحة :)

محمد يقول...

أنا مش اتحرجت

ولكن أنا كنت أقرأ تعليقات الناس اللي قبلي فلمحت تعليق أحمد ففتح لي الفكرة حتى قبل ما أفكر في الموضوع وبما إنك حذفت التعليق إذا إجابتي صحيحة

وأكيد السبب في إجابتي هو أحمد الدرعة

Dr.khaled يقول...

الاعراب الصحيح بقه عشان مش عايزين نحرج الناس اكتر من كده


أكل : فعل ماضي مبني على الفتح لا محل له من الإعراب

الطالب: فاعل مرفوع وعلامة رفعه الضمة الظاهرة

حذاءَ: ظرف مكان (معناها ههنا مش الجزمة..لان طبعا تبقى الجملة ملهاش فايدة )
و حذاء مضاف
و
شيخٍ: مضاف اليه مجرور وعلامة جره الكسرة الظاهرة
وهو مضاف والهاء ضمير متصل

============================

الحمد لله على كل حال...وطبعا انا مش هقول اللي جاوبوا الاجابات الصحيحة مين, لأنهم معروفين من ان التعليقات بتاعتم اتحذفت..وأولهم الباشمهندس /عصفور :)
============================

الجايزة : مفيش

============================
التدوينة دي ما يميزها..هي تعليقاتكم انتم...لانها أثبتت إن معظم المدونين اللي علقوا يقدروا يألفوا لغة جديدة خاصة بيهم :)
يعني لو واحد فيهم على جزيرة بعيد\ لوحدة في المحيط الهادئ..ومعاه 2---3 هنود
يقدر يحط قواعد من عنده و...هكذا :)
===========================
أعتقد ان التدوينة دي كانت فرصة طيبة لكل واحد فينا انه يقف مع نفسه وقفة ..ويفكر ..هل احنا -وانا معاكوا طبعا- نقدر نحمي اللغة العربية؟؟
طبعا ...الاجابة لا
وزي ما العلماء بيقولوا : لولا القرآن الكريم...لضاعت اللغة العربية

طيب ايه رايكوا نتعلم اللغة العربية؟.؟؟
الموضوع سهل جدا ان شاء الله ومش صعب
هما 25 يوم هتضبط فيهم لسانك ان شاء الله
25 درس فيديو نحو بالصوت واصلورة لاحد الاساتذة بجامعة الازهر بقسم اللغة العربية...بيضرح فيها النحو ع السبورة
تقدروا تنزلوها من الرابط ده....وهتفيدكوا جدا جدا ان شاء الله -تعالى-
ولا تنسوني من دعاءكم
أخوكم/خالد

ده الرابط...اللي عليه كل الروابط -ان شاء الله- وعلى فكرة الراوبط فيه مباشرة وبتدعم استكمال التحميل بعد الانقطاع كمان

http://www.muslm.net/vb/showthread.php?t=174557&highlight=%DE%E6%C7%DA%CF+%C7%E1%E1%DB%C9

معلش انسخوا الرابط وحطوه في المتصفح


وهتلاقوا بعض الدروس مش بتتحمل ابقوا قولوا لي عليها وانا اجيبها لكم ان شاء الله...
مع ملاحظة ان بعض ردودي على الاخت/ام عبد الرحمن...ممكن تلاقوا فيها الجملة دي (تسلم ايديك يا عسل)
وعلشان محدش يظن بيا الظن السوء
ان الاخت كان زمان اسمها (فرشي التراب) وانا كنت فاكره اخ مش اخت
بس بعد كده تقريبا غيرت اسمها في المنتدى الى ام عبد الرحمن
وجزاكم الله خيرا

حازم..بس مش دايما بكون مع نفسي حازم...بس الاكيد ان ضميري هو اللي دايما معايا حازم يقول...

الا قولي يا ضكتره هي الدكتوراة بتاعتك في حتي

أكلت السمكةحتي ذيلها
اعرب ذيلها

وبعدين محدش احسن من حد انت كمان معرفتش معني قوقاز
هو انت كان معاك ملحق عربي برضه ؟؟
ههههههههههههههههههههه

امتي هتنشر الحل الصح عايز اعرفه؟؟

عصفور المدينة يقول...

وأنا اللي كنت شايل هم الدرس جزاك الله خيرا
وبعدين انا أول واحد جاوبت فعلا بس ده عشان انا باستخدم آر إس إسوباشوف المدونين اللي بيحطوا تدوينات جديدة بسرعة
لكن الأفاضل كثر
رجاء من الأخوة زيارة موضوعي آلية التشرد في المدونات وموضوع د فضفضة

خمسة فضفضة يقول...

السلام عليكم ورحمة الله وبركاته

ايه دا يا دكتور خالد انتوا قاعدين تعملوا هنا مسابقات وجوايز وبط
وسايبيني لوحدي الف في المدونات ادور علي اللي ينفع تتحط في محرك بحث مدونة نظيفة

علي كل حال مش مشكله

بس انا بقي عاوزه الوبنج لفت والوينج رايت بتوع البطه وماتقوليش خلاص اتاكلوا

أحمد عبد الفتاح يقول...

تصدق يا خالد بدأت اكرهك
ما كنا حلوين وبنتكلم الكلام الشعبي اللذيذ
وعلي راي سعيد صالح
متقوليش قطة خمسية في قطة بلدي وقطة سيامي
عالعموم
أمي مدورسة عربي تدفع كام واخليها تعربها ؟

نبع اللغه يقول...

السلام عليكم انا نبع اللغه من السعوديه وسجلت في المنتدى لكي أعرب الجمله التي طرحها الاخ والاعراب هو اكل: فعل ماض مبني على الفتح الطالب :فاعل مرفوع بالضمه حذاء :ظرف مكان مبني على الفتح وهو مضاف شيخه: مضاف اليه مجرور بالكسرة وهو مضاف والهاء في محل جر مضاف اليه

نبع اللغه يقول...

تنووووووووووويه مهم معنى كلمه حذاء ليس الحذاء ليس المقصود منه مايلبس لستر او لحمايه القدم انما معناها في اللغه اي اكل الطالب بجانب او بمحاذاه شيخه.وشكرا

نبع اللغه يقول...

انا اتمنى من الاكل الذي وضع جمله الاعراب ان يعرب هو هذه الجمله وهي ( جاء زميلي )والاعراب للجميع ولكن بالاخص الاخ الذي وضع جمله الاعراب. وشكرا

نبع اللغه يقول...

يااخ خالد انا اتأسف لاني اعربت الجمله ولم ارى انك اعربتها واشكرك ولا تنسى تعرب الجمله

غير معرف يقول...

انامش عرفة اعرب جملة طويلة لو اعربتها لك الشكر والاحسان وهى يحترم الناس المعلم فى كل امة لانه مشغل النور فقد قال احد الحكماء من علمنى حرفا سرت له عبدا ومهما انتشرت المخترعات فسوف يظل المعلم نفسه هو العنصر المهم فى التربية والتعليم

احمد محمد يقول...

ظرف مكان لان معناها جانب