لماذا اخترت اسم مدونتك؟؟؟ أعربها؟؟لماذا تدون؟؟؟
الحق أن الاسم فيه تفصيل….
فكلمة ضاكتور….هي تحريف لفظي لكلمة أعجمية هي كلمة دكتور…..بدون دخول في دروس النحو والصرف… أن الكلمة المعبرة عن مهنتي هي طبيب…أو كما كان يسمى -إلى وقت ليس بالبعيد- …(حكيــم)
إنما اختياري لكلمة ضاكتور....لأنها الأكثر شيوعاً على ألسنــة الفقراء...والغلابة...-طبعا الشعب كله الوقتي غلبان-... دايما لما بانزل بلدي...اللي اتولدت فيها وعشت أيام الطفولة وبدايات الشباب فيها.... أجد هذه الكلمة تلاحقني...خاصة من أمهاتنا السيدات المسنات كبيرات السن....
فأشعر وأنا أسمعها منهن..بالبساطة...بأنني قريب من هؤلاء الناس....
وأتذكر حديث النبي-ص- الذي رواه الترمذي والبيهقي...وهو صحيح.. (اللهم أحيني مسكينا وأمتني مسكينا واحشرني في زمرة المساكين يوم القيامة) وأتذكر قول الله عزوجل ( وقال إنني من المسلمين)
أنا من هؤلاء الناس....لست من علية القوم....أنا أحد هؤلاء البسطاء...الذين يحبون الله..يحبون رسول الله...يتمنون رضا الله.... إيمان هؤلاء العجائز...يشعرك وأنت تتحدث معهم..بأنهم أهلك...بلا نسب أو مصاهرة..
ورغم أن زياراتي لبلدتي قليلة...إلا أنني بعد كل مرة ..أعود بروح إيمانية عالية...خصوصا بعد الاختلاط بهؤلاء الإخوة والأخوات...الذين تتجاوز أعمارهم الستين..بل والسبعين...
فاختياري لهذا الاسم...لحبي لهم..وحبي لطريقتهم البسيطة والفطرية في نطقه... من مصــر.... فأنا من مصر...قلبا وقالبا... وأنا سعيد لهذا....وكلما قرأت في تاريخ أجدادنا الفاتحين من السلف الصالح.....
فإنني أترضى عليهم.... فلولا هؤلاء القوم...لكنا فحما في نار جهنم.... هم قد ضحوا بأموالهم وأنفسهم وراحتهم من أجل أن يمنحونا منحة...وجواز مرور إلى جنة الخلد-بإذن الله تعالى-....
فتركوا أموالهم وديارهم ونساءهم وذراريهم وأتوا ليرشدونا...إلى صراط الله المستقيم...ويخرجوننا من عبادة العباد إلى عبادة رب العباد....ومن ضيق الدنيا إلى سعة الدنيا والآخرة....
فرضي الله عن عمر بن الخطاب وعن عمرو بن العاص وعن جميع الصحابة والتابعين وتابعيهم بإحسان إلى يوم الدين..
من مصر : هي بلدي...وحبي لبلدي..حب فطري ...غير مكتسب...
وزي ما الشاعر قال زمان...قبل ما نتولد...
كم منزل في الأرض يألفه الفتى...وحنينه أبداً لأول منزل
كان نفسي أعرب لكوا المدونة..وأقول ضاكتور مبتدأ وخالد خبر ..ومن مصر حار ومجرور ..شبه جملة...والمأروصة صفة لمصر...
والصفة تتبع الموصوف تذكيرا وتأنيثا وإفرادا وجمعا...
بس مش مهم الإعراب المرة دي....
المأروصة...
أعتقد إنه الأمر مش محتاج إني أتكلم فيه.....أظن إن المقدمة اللى تحت عنوان المدونة يقدر بيها أي حد يعرف من مين مصر مأروصة...
الحقيقة ده غالبا ممكن تلاقوه في تلت تدوينات كتبتهم من حوالي 8 أو 9 شهور بعنوان (حوار مع مريضة) وهو مكون من 3 أجزاء...
مصر مأروصة من كل من يخالف شرع الله ومنهج رسول الله-ص-
من اليهود مأروصة...من بعض النصارى الغير متعقلين مأروصة..
من الشيعة مأروصة..أو بدأت تتأرص...وتابعوا الأخبار اليومين دول وانتوا تفهموا...
من العلمانيين مأروصة...
من الشيوعيين...يعني شوية..لو انهم-والحمد لله- بدأوا في الاضمحلال...
من الليبراليين مأروصة...
من العقلانيين مأروصة....
من الأفكار القومية اللي الاسلام لغاها
مأروصة من المنافقين في الداخل مأروصة....
من كتير من بني جلدتنا مأروصة......
يعني الاسم مش من فراغ يا اخواننا...
وسع يا بني...
المهم..دورنا احنا ...اننا نشيل عنها الأرص من العالم دي كلها..
أو حتى نخففه...
أو حتى نوصل رسالة الدين للجيل اللي بعدينا بدون تحريف في ثوابته ولا مبادئه..وبدون لعب في أصوله...
باختصار...أنا ضاكتور خالد من مصر المأروصة.....
باتمنى..على الله عزوجل-
أن يأتي يوم وأنا حي...أغير فيه اسم مدونتي من مصر المأروصة ..إلى مصر المحروسة...
المحروسة برجالها وشبابها ونسائها..وفتياتها..
بشباب يهبوا لنصرة الدين...بترك الذنوب...وتعلم العلوم....
وإن قدر لهم الجهاد في سبيل الله جاهدوا...
وساعة ما نتخلص من نوازع الهوى والشهوة...ساعتها هتبقى بلدنا -بفضل الله محروسة-
إن تنصروا الله(بترككم الذنوب واستقامتكم على شرعه ومنهج نبيه) ينصركم (على أنفسكم وعلى أعدائكم) ويثبت أقدامكم(على الصراط المستقيم.في الدنيا..وثم بفضله يثبتكم على الصراط في الآخرة)
لماذا أدون؟؟؟؟؟
فيه واحد بيدون عشان زهقان من الدنيا...
وواحد تاني بيدون لأنه واخد الموضوع هواية...
في واحدة بتدون لأنها عندها أفكار طيبة...
فيه واحدة بتدون لأنها عايزة شباب يشجعوها
فيه واحد بيدون عشان يلم بنات في المدونة...
وفي واحدة بتدون عشان تلم شباب في مدونتها
فيه واحد بيدون عشان ينشر فكر معين...قد يكون الفكر ده..صالح...أو طالح...
ممكن تلاقي حد بيدون...عشان بيحب انه يلاقي فيه ناس في مدونته بيشجعوه..ويصقفوا ليه...
فيه واحد تاني بيدون عشان هومش بيقدر يتكلم مع الناس في أرض الواقع...إما لجبنه أو لأن المجتمع بيرفض ألإكاره...فبالتالي هو بيدون من وراء النت...عشان المواجهة الفكرية بالنسبة ليه بتكون صعبة....
ممكن برضه تلاقي واحد بيدون وخلاص...
يعني بيدون كده وخلاص....
دي بعض النوايا بتاعت المدونين (مش الموضوعات بتاعتهم) أو الكتاب عموما....
واحد جدع يقوللي وانته عرفت منين نياتهم؟؟؟
لا لا...أنا مش باقول فلان نيته كذا وفلان نيته كذا....دي لا يعلمها إلا الله-عزوجل-
إنما دي من باب (ما بال أقوام)
طيب...
حبيبي في الله...مش غلط انك تضيع وقتك وفلوسك على النت بدون فايدة؟؟؟
مع انك هتتسأل عن الوقت ده وعن الفلوس دي....
إيه رأيك إنك قبل ما تكتب أي موضوع تخلص النية لله في الأمر ده؟؟؟
هتقولي..يووه..حتى الدين في دي كمان..ارحمونا بقه ضيقتوا علينا العيشة....
أبتسم وأقولك...حبيبي في الله
(قل إن صلاتي ونسكي ومحياي ومماتي لله رب العالمين)
أنا مش باتحرك سنة يارب إلا لوجهك الكريم....
يقول شيخ الاسلام ابن تيمية-رحمه الله- ...
تاني ابن تيمية؟؟؟
تاني وتالت وعاشر ...
يقول : (كل حركة في هذا الكون قائمة على الحب...وكل سكون في هذا الكون قائم على الحب)
مش الحب بتاع قلب وسهمين ..وكيوبيد(إله الحب عند الوثنيين)
لأ..الحب المطلق.....
أنا بانقل دي من هنا لهنا لأني حابب إن الشكل يبقى كده....
يعني الكلام معناه كده
لذا فإجابتي هي
...... تنويه.....
ذكر لأصحاب المناهج الوضعية السابقة..لا يعني أني أرفضهم الرفض الكلي.... أو الإقصائية الفكرية....
لكن إذا ما كان هناك سبيل للحوار المتمدن(بتاعنا احنا مش بتاعهم هما)...بدون سب أو ما شابه فأهلا بالقوم والشاي عندنا.....
ده مش تاج...دول 3 أسألة
س-1 ليه اخترت اسم مدونتك كده...؟؟ بالتفصيل الممل
س2 - أعرب اسم مدونتك...
س3- لماذا تدون؟؟؟
أود توجيه الأسألأة التلاتة للمهندس الشيخ
عصفور المدينة
والاخ البيروني...
والأخ إمام الجيل ..اللي مخاصمنا ومش بيجي من زمان
وللأخ المهاجر إلى الله...
واللي عايز يتسألهم يتفضلهم...
ويللا ربنا ميحرمكوا مني....
-----------------------
